హ్యాపీడేస్ సినిమాతో కాలేజీ స్టూడెంట్స్ అభిమాన దర్శకుడిగా శేఖర్ కమ్ముల పేరు తెచ్చుకున్నారు. రీసెంట్ గా అతను తెరకెక్కించిన ఫిదా కూడా యువతని ఆకట్టుకుంది. ప్రేమ కథలని మనసుకుహత్తుకునేలా తీయడంలో కమ్ముల స్పెషల్. అలాగే రీసెంట్ గా అర్జున్ రెడ్డి సినిమాతో యువతతో జేజేలు అనిపించుకున్న హీరో విజయ్ దేవరకొండ. ఈ యువ హీరో, శేఖర్ కమ్ముల దర్శకత్వంలో నటించబోతున్నట్టు ఫిలిం నగర్ వాసులు చెప్పుకుంటున్నారు. శేఖర్ కమ్ముల చెప్పిన కథ నచ్చడంతో విజయ్ వెంటనే ఓకే చెప్పినట్లు సమాచారం. ప్రస్తుతం విజయ్ దేవరకొండ గీతా ఆర్ట్స్ 2 బ్యానర్ లో సినిమా చేస్తున్నారు.
శ్రీరస్తు శుభమస్తుతో హిట్ కొట్టిన పరశురామ్ ఈ చిత్రానికి దర్శకత్వం వహిస్తున్నారు. పూర్తి ఫ్యామిలీ ఎంటర్టైన్మెంట్గా తెరకెక్కుతున్న సినిమాని బన్ని వాసు నిర్మిస్తున్నారు. కన్నడ బ్యూటీ రష్మికా మందన హీరోయిన్ గా నటిస్తున్న ఈ సినిమాకి “గీతా గోవిందం” అనే టైటిల్ను ఫిక్స్ చేశారు. త్వరలోనే ఈ సినిమా రిలీజ్ కానుంది. ఈ సినిమాతో పాటు అభినేత్రి సావిత్రి బయోపిక్ మూవీ “మహానటి”లో అక్కినేని నాగేశ్వరరావు పాత్రలో విజయ్ కనిపించనున్నారు. అలాగే శ్రీధర్ మర్రి దర్శకత్వంలో “ఏ మంత్రం వేసావె” సినిమా చేస్తున్నారు. తెలుగు సినిమాలే కాకుండా తమిళ చిత్రం కూడా చేస్తున్నారు. “నడిగయ్యార్ తిలగం” అనే చిత్రంలో హీరోగా విజయ్ చేస్తున్నారు. ఈ సినిమాల తర్వాత శేఖర్ కమ్ముల, విజయ్ దేవరకొండ కాంబో మూవీ సెట్స్ మీదకు వెళ్లనుంది. అప్పటి వరకు డైరక్టర్ ఆగుతారా.. లేకుంటే మధ్యలో మరో మూవీ చేస్తారా? అనేది త్వరలోనే తెలియనుంది.
