టాలీవుడ్ లో గేమ్ చేంజర్ మూవీగా వచ్చిన ‘అర్జున్ రెడ్డి’ చిత్రం ఎంత సెన్సేషన్ క్రియేట్ చేసిందో ప్రత్యేకంగా చెప్పనక్కర్లేదు. ఈ చిత్రంతో ఒక్కసారిగా స్టార్ హీరో అయిపోయాడు విజయ్ దేవరకొండ. ఇప్పుడు ఇదే చిత్రాన్ని కోలీవుడ్, బాలీవుడ్ లలో రీమేక్ చేస్తున్న సంగతి తెలిసిందే. ‘వర్మ’ పేరుతో ఈ చిత్రాన్ని కోలీవుడ్ లో అలాగే ‘కబీర్ సింగ్’ పేరుతో బాలీవుడ్ లోనే రీమేక్ అవుతున్నాయి. తమిళ్ లో సందీప్ రెడ్డి వంగా శిష్యుడు గిరీష్ డైరెక్ట్ చేస్తుండగా.. బాలీవుడ్ లో స్వయంగా సందీప్ రెడ్డి వంగానే డైరెక్ట్ చేస్తున్నాడు.
ముఖ్యంగా బాలీవుడ్ లో ఈ చిత్రం పై మొదట్లో అనుమానాలు ఉన్నా టీజర్, ట్రైలర్లు విడుదలయ్యాక మంచి అంచనాలే ఏర్పడ్డాయి. షాహిద్ కపూర్, కియారా అద్వానీ హీరో హీరోయిన్లుగా నటిస్తున్న ఈ రీమేక్ పై ఒరిజినల్ అర్జున్ రెడ్డి అదేనండీ.. మన విజయ్ దేవరకొండ స్పందించాడు. ‘ఖచ్చితంగా హిందిలోనూ ఇది బ్లాక్ బస్టర్ అవుతుందని షాహిద్ కపూర్ తన స్టైల్ తో దీనికి ప్రాణం పోసుంటాడని నమ్మకం వ్యక్తం చేశాడు విజయ్ దేవరకొండ’. ఈ రిమేక్ గురించి తెలుగు ప్రేక్షకులు ఎంతో ఆసక్తితో ఎదురుచూస్తుండడం విశేషం.
