కాసేపు కనిపించి నవ్వులు పూయించనున్న విజయ్ దేవరకొండ

పెళ్లి చూపులు సినిమా అటు డైరక్టర్ తరుణ్ భాస్కర్ కి, ఇటు హీరో విజయ్ దేవరకొండ కి మంచి గుర్తింపును తీసుకొచ్చింది. ఈ చిత్రం తర్వాత అర్జున్ రెడ్డి మూవీతో విజయ్ మరింత ఫేమస్ అయ్యారు. ఇప్పుడు నోటా, గీత గోవిందం వంటి సినిమాల్తో బిజీగా ఉన్నారు. మహానటి సినిమాలో చిన్న రోల్ చేసిన విజయ్ దేవరకొండ తనకి లైఫ్ ఇచ్చిన తరుణ్ భాస్కర్ సినిమాలో గెస్ట్ రోల్ చేశారు. తరుణ్ పెళ్లిచూపులు తర్వాత స్టార్ హీరోలతో సినిమాలు చేయకుండా కొత్తవారితోనే “ఈ నగరానికి ఏమైంది” సినిమా చేశారు. సుశాంత్ రెడ్డి, విశ్వక్ సేన్ నాయుడు, వెంకటేష్ కాకుమాను, అభినవ్ గోమటం తదితరులు నటించిన ఈ మూవీని ప్రముఖ నిర్మాత డి సురేష్ బాబు నిర్మించారు. ట్రైలర్ తో ఆసక్తి నెలకొల్పిన ఈ చిత్రం రేపు రిలీజ్ కాబోతోంది.

ఈ సందర్భంగా విజయ్ మాట్లాడుతూ “”ఈ నగరానికి ఏమైంది”లో నేను గెస్ట్ రోల్ చేసాను. పెళ్లి చూపులు సినిమాతో నాకు మంచి హిట్ ఇచ్చి ప్రేక్షకుల్లో ఆదరణ తెచ్చిన తరుణ్ కోసం ఈ మూవీ లో ఓ చిన్న పాత్రలో కనిపించబోతున్నాను.  పాత్ర చాలా కామెడీ గా ఉంటుంది” అని వెల్లడించారు. “నీ గ్యాంగ్ తో థియేటర్ కి రా,  చూస్కుందాం” అనే ట్యాగ్ లైన్ తో వస్తున్న మూవీకి ఓవర్సీస్ లోను మంచి క్రేజ్ ఉంది. అందుకే ఈ చిత్రాన్ని యూఎస్ లో సుమారు 142 లొకేషన్లలలో విడుదల చేయబోతున్నారు. పెళ్లి చూపులు చిత్రానికి సంగీతం అందించిన వివేక్ ఈ చిత్రానికి మ్యూజిక్ అందించారు. ఇప్పటికే పాటలు యువత మదిలోకి చేరిపోయాయి. సినిమా ఏ మాత్రం చేరుకుంటుందో కొన్ని గంటల్లోనే తెలియనుంది.