వరుసగా రిలీజ్ కి సిద్ధమవుతున్న విజయ్ దేవరకొండ సినిమాలు

అర్జున్ రెడ్డి సినిమా తర్వాత విజయ్ దేవర కొండ మహానటి చిత్రంలో గెస్ట్ రోల్ చేశారు. ఇది అతని అభిమానులకు సరిపోలేదు. ఫుల్ మీల్స్ కోసం ఎదురుచూస్తున్నారు. అతను ఎప్పుడో షూటింగ్ కంప్లీట్ చేసిన “టాక్సీవాలా” మే 18 నుంచి వాయిదా పడుతూ వస్తోంది. ఈ మూవీ ఫుల్ సర్వీసింగ్ చేసుకొని వచ్చే నెల రిలీజ్ కాబోతోంది. జులైలో ఈ మూవీ హంగామా పూర్తికాకముందే గీత గోవిందం థియేటర్లోకి రానుంది. శ్రీరస్తు శుభమస్తుతో హిట్‌ కొట్టిన పరశురామ్‌ ఈ చిత్రాన్ని దర్శకత్వం వహించారు. గీతా ఆర్ట్స్‌ 2 బ్యానర్‌ లో నిర్మితమైన ఈ మూవీలో కన్నడ బ్యూటీ రష్మికా మందన హీరోయిన్ గా నటిస్తోంది.

మొదటి లుక్ తోనే విశేషంగా ఆకట్టుకున్న ఈ మూవీ ఆగస్టు 20న విడుదల కావడం ఖాయమని చిత్రబృందం చెబుతోంది.అంతేకాకుండా రాజకీయ నేపథ్యంలో విజయ్ దేవరకొండ నోటా సినిమా చేస్తున్నారు. ఏకకాలంలో తెలుగు, తమిళ భాషల్లో తెరకెక్కుతోన్న ఈ చిత్రంలో మెహ్రీన్ హీరోయిన్ గా నటిస్తోంది. ఆనంద్ శంకర్ దర్శకత్వం వహిస్తోన్న ఈ సినిమా, చిత్రీకరణ పరంగా చివరిదశకు చేరుకుంది. జ్ఞానవేల్ రాజా సమర్పిస్తోన్న ఈ సినిమాని సెప్టెంబర్ లో రిలీజ్ చేయడానికి సన్నాహాలు చేస్తున్నారు. ఇలా వరుసగా వినోదాన్ని పంచడానికి విజయ్ దేవరకొండ సినిమాలు ముస్తాబవుతున్నాయి. ఈ విషయం విజయ్ అభిమానులకి నిజంగా శుభవార్తే.