యువ హీరో విజయ్ దేవరకొండ పెళ్లి చూపులు మూవీ తర్వాత కొత్త దర్శకుడు సందీప్ రెడ్డి దర్శకత్వంలో చేసిన అర్జున్ రెడ్డి సంచలనం సృష్టించింది. గత ఏడాది విడుదలయిన ఈ సినిమా సామాన్య ప్రేక్షకులతో పాటు సెలబ్రిటీల అభినందనలు అందుకుంది. కలక్షన్ల వర్షం కురిపించిన ఈ చిత్రాన్ని తమిళంలో, హిందీలో రీమేక్ చేయడానికి పోటీ పడి హక్కులను సొంతం చేసుకున్నారు. ఆ చిత్రానికి సీక్వెల్ వస్తుందని కొన్ని రోజులుగా ఫిలిం నగర్లో రూమర్లు గుప్పుమన్నాయి. ఈ విషయాన్నీ హీరో విజయ్ ని అడగగా నిజమేనని చెప్పారు.
అతను నటించిన ట్యాక్సీవాలా త్వరలో రిలీజ్ కాబోతోంది. ఈ సినిమా టీజర్ రిలీజ్ అయి విశేష స్పందన అందుకుంది. ఈ సందర్భంగా మీడియా ముందుకు వచ్చిన విజయ్ మాట్లాడుతూ.. “అర్జున్ రెడ్డి కి సీక్వెల్ చేసే ఆలోచన ఉంది. దీనిపై సందీప్, నేను చర్చించుకున్నాము. ఒకవేళ సీక్వెల్ తీస్తే అందులో 40 ఏళ్ల వయసులో అర్జున్ రెడ్డి జీవితం ఎలా ఉంటుంది అనేది చూపించాలని అనుకుంటున్నాము. మరి అన్నీ కుదిరి ఈ సీక్వెల్ ఎప్పుడు వర్కవుట్ అవుతుందో చూడాలి” అని వివరించారు. సందీప్ వంగ బాలీవుడ్ లో అర్జున్ రెడ్డి ని రీమేక్ చేసే పనిలో ఉన్నారు. దాని తర్వాత మహేష్ బాబు తో సినిమా తీయనున్నారు. ఇక విజయ్ నాలుగైదు సినిమాలకు ఒకే చెప్పారు. మరి వీరి కాంబినేషన్లో అర్జున్ రెడ్డి 2 ఎప్పుడు పట్టాలెక్కుతుందో చూడాలి.
