హిందీ రీమేక్ కు రెడీ అవుతున్న గీత గోవిందం

టాలీవుడ్ లో గతేడాది విడుదలై సంచలన విజయం సాధించిన చిత్రాల్లో “గీత గోవిందం” ఒకటి. చిన్న సినిమాగా విడుదలై అఖండ విజయం సొంతం చేసుకొని.. విజయ్ దేవరకొండనీ 100 క్రోర్స్ క్లబ్ లో జాయిన్ చేసింది. ఈ చిత్రాన్ని ఇప్పుడు బాలీవుడ్ లో రీమేక్ చేయడానికి సన్నాహాలు చేస్తున్నారు. విజయ్ దేవరకొండ నటించిన “అర్జున్ రెడ్డి” చిత్రం బాలీవుడ్ లో షాహిద్ కపూర్ హీరోగా రూపొందుతున్న విషయం తెలిసిందే. ఇప్పుడు అతడి పిన్ని కొడుకు ఇషాన్ కోసం “గీత గోవిందం” రీమేక్ రైట్స్ తీసుకొన్నాడట.

ఆల్రెడీ విజయ్ దేవరకొండకి బాలీవుడ్ లో భీభత్సమైన ఫాలోయింగ్ ఏర్పడింది. ఇప్పుడు అతడి చిత్రాలు ఇలా వరుసబెట్టి బాలీవుడ్ లో రీమేక్ అవుతుండడంతో ఆ క్రేజ్ డబుల్, త్రిబుల్ అవుతోంది. ఈ హడావుడి అంతా చూస్తుంటే.. విజయ్ దేవరకొండ బాలీవుడ్ డెబ్యూకి ఎక్కువ రోజుల జాప్యమైతే కనిపించడం లేదు. చూద్దాం మరి అర్జున్ రెడ్డి, గీత గోవిందం చిత్రాలు తెలుగులో ఆడినంతగా బాలీవుడ్ లో ఆడతాయో లేదో. ఎందుకంటే.. విజయ్ నటించిన పెళ్ళిచూపులు సినిమా కూడా బాలీవుడ్ లో రీమేకై డిజాస్టర్ గా నిలిచిన విషయాన్ని కూడా పరిగణలోకి తీసుకోవాలి.