గజని మ్యాజిక్ రిపీట్ కానుందా?

ఏ ఆర్ మురుగ దాస్ అనగానే గజిని సినిమా గుర్తుకొస్తుంది. ఈ సినిమా తెలుగు, తమిల్ భాషల్లో హిట్ కొట్టింది. అంతే కాదు మురుగ బాలీవుడ్ అవకాశం కొట్టేసాడు. అమీర్ ఖాన్ తో గజిని సినిమా తీసి విజయం అందుకున్నాడు. ఇదివరకు టాలీవుడ్ లో మెగాస్టార్ చిరంజీవితో స్టాలిన్ సినిమా తీసి పక్కా కమర్షియల్ డైరక్టర్ అని నిరూపించుకున్నాడు. ఇంతక ముందు చిరు తీసిన టాగూర్, తీయబోయే కత్తి మూవీ మురుగ దాస్ తమిళంలో రూపొందించిన సినిమాలకు రీమేక్ లే. అంతటి పేరున్న మురుగ తెలుగు సూపర్ స్టార్ మహేష్ బాబుతో సినిమా తీయనున్నారు. ఈ సినిమాలో హీరోయిన్ బాలీవుడ్ సుందరి పరిణీత చోప్రా ఓకే అయింది.

మ్యూజిక్ డైరక్టర్ గా ఎవరిని తీసుకోవాలని మురుగ దాస్ ఆలోచనలో పడ్డాడు. తన గజినీ సినిమాకు సంగీతం అందిన హరీష్ జయరాజ్ కి ఇవ్వాలా? లేటెస్ట్ హిట్ కత్తికి కత్తిలాంటి పాటలు ఇచ్చిన అనిరుద్ రవిచంద్రన్ కి ఇవ్వాలా ? అని తర్జన భర్జన పడ్డాడు. చివరికి హరీష్ జయరాజ్ నే ఓకే చేసినట్లు తెలిసింది. ప్రస్తుతం లండన్ టూర్ లో ఉన్న మహేష్ బాబు హైదరాబాద్ కి తిరిగి రాగానే అతనితో సంప్రదింపులు జరిపి సినిమా పూర్తి క్రూ వివరాలను వెల్లడించనున్నారు.

మురుగ దాస్ గత చిత్రాల మాదిరిగానే సామాజిక సమస్యల నేపధ్యంలో ఈ కథ సాగుతుంది. ఈసారి న్యాయ వ్యవస్థ పై సెటైర్ వేయనున్నట్లు సమాచారం. ఈ చిత్రాన్ని టాగూర్ మధు, ఎన్ వీ ప్రసాద్ లు నిర్మించ నున్నారు.