చైతూ హిట్ బాటలో ‘సాగిపో’తాడా..?

అప్పటికే ఒడిదుడుకుల ప్రయాణంలో ఉన్నవాడు కాస్త ‘దోచేయ్’తో మరో గట్టి దెబ్బ తిన్నాడు. ఇక లాభం లేదనుకుని రూట్ మార్చి తొలి హిట్ ఇచ్చిన దర్శకుడు వద్దకు చేరుకున్నాడు. అతడెవరో ఈపాటికే పసిగట్టుంటారే..! అతడే అక్కినేని హీరో నాగచైతన్య. అయితే ఆ సినిమా కంటే ముందే ‘ప్రేమమ్’ రీమేక్ తో హిట్ కొట్టాడు. ఇప్పుడు గౌతమ్ మీనన్ సినిమా కూడా విడుదలకు వచ్చిందట. దోచేయ్ సినిమా తర్వాత గౌతమ్ మీనన్ తో ‘సాహసం శ్వాసగా సాగిపో’ సినిమా చేశాడు చైతు. ఒకే కథతో రెండు భాషల్లో సినిమాలు చేసే గౌతమ్ ఈ సినిమా తమిళ వెర్షన్ ను వివాదాల సావాసి శింబుతో చేశాడు.

కారణాలేవైనా ఈ సినిమా తెలుగు వెర్షన్ పూర్తయినా తమిళ వెర్షన్ పూర్తి కాలేదు. ఆ కారణంగా చైతు సినిమా ఆలస్యమవుతూ వచ్చింది. ‘ఏమాయ చేశావే’ తర్వాత చైతు-గౌతమ్ కలయికలో వస్తున్న సినిమా కావడంతో పాటు రెహమాన్ సంగీతమందించిన పాటలు సినిమాపై ఆసక్తిని పెంచాయి. ఎట్టకేలకు శింబు తన వంతు పని పూర్తి చేశాడట. మిగిలిన పోస్ట్ ప్రొడక్షన్ పనులను వేగవంతం చేసిన దర్శకుడు సినిమాను నవంబర్ లో విడుదల చేయనున్నట్టు ప్రకటించాడు. ఈ నెల 6న విడుదలైన ‘ప్రేమమ్’తో విజయం అందుకున్న చైతూ ‘సాహసం’తోను అదే బాటలో సాగిపోతాడా లేదా అని సినీ వర్గాల్లో ఆసక్తి నెలకొంది.

https://www.youtube.com/watch?v=x0m-Kf_1iA8