మిల్కీ బ్యూటీకి బాలీవుడ్ ఆశలు పోలేదే!

టాలీవుడ్ లో స్టార్ హీరోయిన్ గా దూసుకుపోయింది తమన్నా భాటియా. తమిళంలో కూడా తన సత్తా చాటింది. తెలుగులో చిరంజీవి, వెంకటేష్, పవన్ కళ్యాణ్, మహేష్ బాబు, ప్రభాస్ ఇలా అగ్ర హీరోలందరి సరసన కలిసి నటించింది. కోలీవుడ్ లో విజయ్, అజిత్, సూర్య లాంటి టాప్ హీరోలతో ఆడిపాడింది. నిజానికి ఈ బ్యూటీ ముందుగా తన మాతృ భాష అయిన హిందీలోనే హీరోయిన్ గా ఎంట్రీ ఇచ్చింది.

కానీ ఆ సినిమా ఫ్లాప్ అవ్వడంతో సౌత్ కి వచ్చి స్టార్ హీరోయిన్ గా ఎదిగింది. అయితే ఆమెకి బాలీవుడ్ ఆశలు మాత్రం పోలేదు. సౌత్ లో పాపులర్ అయ్యాక బాలీవుడ్ లో పేరు సంపాదించాలనుకుంది. కానీ ఆ కోరిక మాత్రం ఫలించడం లేదు. మధ్యలో ఒకట్రెండు హిందీ సినిమాలు చేసింది కానీ వర్కవుట్ అవ్వలేదు. ఆమె నటించిన ‘హిమ్మత్ వాలా’ అయితే డిజాస్టర్ అయింది.

అయినప్పటికీ తమన్నా మాత్రం తన ప్రయత్నాలు మానుకోలేదు. ఇప్పుడు సౌత్ లో ఆమెకి డిమాండ్ తగ్గడంతో మళ్లీ బాలీవుడ్ పై కన్నేసింది. చాందిని బార్, ఫ్యాషన్ లాంటి అవార్డ్ విన్నింగ్ సినిమాలు తీసిన ఫిలిం మేకర్ మధుర్ భండార్కర్‌ సినిమాలో నటించే అవకాశాన్ని దక్కించుకుంది. వీరిద్దరి కాంబినేషన్ లో ‘బబ్లీ బౌన్సర్’ అనే సినిమా మొదలైంది. పరిమిత బడ్జెట్ లో లేడీ ఓరియెంటెడ్ సినిమాగా దీన్ని తెరకెక్కిస్తున్నారు.

తమన్నా ప్రధాన పాత్రలో చాలా తక్కువ రోజుల్లో ఈ సినిమా షూటింగ్ పూర్తి చేశారాయన. ఫాక్స్ స్టార్ స్టూడియోస్‌తో కలిసి మధుర్ భండార్కర్‌ ఈ సినిమాను నిర్మించాడు. ఈ సినిమాను హిందీతో పాటు తమన్నాకు ఫాలోయింగ్ ఉన్న తెలుగు, తమిళ భాషల్లో కూడా విడుదల చేయడానికి ప్లాన్ చేస్తున్నారు. మరి ఈ సినిమాతోనైనా హిట్ కొట్టి తన కలను నెరవేర్చుకుంటుందేమో చూడాలి!