ప్రముఖుల జీవిత గాథలు కాసులు కురిపిస్తున్నాయి. వాస్తవాన్ని కళ్ళకు కడితే.. కమర్షియల్ సినిమా మాదిరిగా హిట్ సాధిస్తున్నాయి. క్రీడాకారుల, సినీ తారల జీవితాలే కాదు పొలిటికల్ లీడర్స్ బయోపిక్స్ కి కూడా ఇప్పుడు డిమాండ్ ఉంది. అందుకే బాలకృష్ణ తన తండ్రి ఎన్టీఆర్ జీవితగాథను తెరకెక్కించే పనిలో ఉన్నారు. తాజాగా జననేత వైఎస్ రాజశేఖర్రెడ్డి బయోపిక్ ని రూపొందించడానికి సన్నాహాలు జరుగుతున్నాయి. గతంలో రాజశేఖర్ హీరోగా వైఎస్సార్ బయోపిక్ తెరకెక్కించాలని పూరీ జగన్నాథ్ ప్రయత్నించారు. ఎందుకనోగానీ ఆ ప్రాజెక్టు పట్టాలెక్కలేదు. తాజాగా వై.ఎస్. బయోపిక్ ను సిద్ధం చేయడానికి మహి వి.రాఘవ్ ముందుకొచ్చారు.
‘ఆనందో బ్రహ్మ’ సినిమాతో విజయాన్ని అందుకున్న ఈ డైరక్టర్ వై.ఎస్ పై అభిమానంతో స్క్రిప్ట్ ని పక్కాగా రాసుకున్నారు తెలిసింది. అలాగే జననేత పాత్రలో మలయాళ సూపర్ స్టార్ మమ్ముట్టి ని కూడా అడిగినట్లు సమాచారం. ఈ పాత్ర పోషించడానికి ఆసక్తికరంగా ఉన్నట్లు టాలీవుడ్ వర్గాలు తెలిపాయి. అలాగే విజయమ్మ గా నయనతారని ఒప్పించే పనిలో ఉన్నట్టు టాక్. గతంలో వీరిద్దరు కలిసి మలయాళ చిత్రం పుతియా నియమంలోనటించారు. మరి మరోసారి స్క్రీన్ షేర్ చేసుకోబోతున్నారు. రాజశేఖర్ రెడ్డి జీవిత చరిత్రలో ‘పాదయాత్ర’ ఎంతో ముఖ్యమైంది. అందువలన ఈ సినిమాకి ‘యాత్ర’ అనే టైటిల్ ను పరిశీలిస్తున్నారు.
