ఒక్క రూపాయికే విమానం టిక్కెట్!

కోలీవుడ్ స్టార్ హీరోసూర్య నటించిన లేటెస్ట్ సినిమా ‘శూరరై పోట్రు’. ఈ సినిమాను తెలుగులో ‘ఆకాశం నీ హద్దురా’ అనే పేరుతో విడుదల చేస్తున్నారు. లేడీ డైరెక్టర్ సుధా కొంగర రూపొందిస్తోన్న ఈ సినిమాను సిఖ్య , 2డీ ఎంట‌ర్‌టైన్ మెంట్ పతాకంపై సూర్య స్వయంగా నిర్మిస్తున్నారు. దసరా సందర్భంగా ఈ సినిమా ట్రైలర్‌ను సోమవారం నాడు చిత్రబృందం విడుదల చేసింది. డెక్కన్ ఎయిర్ లైన్స్ వ్యవస్థాపకుడు గోపీనాథ్ జీవిత చరిత్ర ఆధారంగా ఈ సినిమాను తెరకెక్కించారు.

అతి తక్కువ రేటుకి ప్రజలు విమాన ప్రయాణం చేసే విధంగా ఓ గ్రామానికి చెందిన యువకుడు కనే కలే ఈ సినిమా. కేవలం ఒక్క రూపాయికే విమానం టికెట్ లభించేలా ఓ విమాన సంస్థను స్థాపించాలనుకున్న సామాన్య వ్యక్తి.. ఈ క్రమంలోనే ఎదుర్కొన్న సవాళ్లను ట్రైలర్ లో చూపించారు. ట్రైలర్ ని బట్టి సినిమా ఎలా ఉంటుందో చెప్పేశారు. సూర్య చెప్పే డైలాగులు, బ్యాక్ గ్రౌండ్ స్కోర్ ట్రైలర్ కి హైలైట్ గా నిలిచాయి.

కరోనా కారణంగా థియేటర్లు మూతపడటంతో సూర్య ఈ సినిమాను అమెజాన్ ప్రైమ్ ద్వారా విడుదల చేయాలని నిర్ణయించుకున్నారు. ముందుగా అక్టోబర్ 30న ఈ సినిమాను విడుదల చేయాలనుకున్నారు కానీ ఇప్పుడు నవంబర్‌ 12కి వాయిదా వేశారు. దక్షిణాది నుండి ఓటీటీలో రిలీజ్ అవుతున్న పెద్ద సినిమా ఇదేనని చెప్పొచ్చు. ఈ సినిమాలో అపర్ణ బాలమురళి హీరోయిన్‌గా నటిస్తుండగా.. మోహన్ బాబు, జాకీష్రాఫ్, పరేష్ రావల్, ఊర్వశి కీలక పాత్రల్లో కనిపించనున్నారు.