Parthiban: నో క్యాస్ట్ సర్టిఫికెట్… ఆసక్తికర వ్యాఖ్యలు చేసిన సీనియర్ నటుడు

ప్రముఖ సీనియర్ నటుడు, దర్శకుడు ఆర్. పార్తిబన్ ఇటీవల తీసుకున్న ఒక సంచలన నిర్ణయం సినిమా, సోషల్ మీడియా వర్గాల్లో హాట్ టాపిక్‌గా మారింది. ఆయన చేసిన వ్యాఖ్యలు, ఆపై తీసుకున్న చర్యలు కేవలం ప్రచారం కోసమేనా లేక ఆయన నిజంగానే సీరియస్‌గా ఉన్నారా అనే సందేహాలు చాలామందిలో వ్యక్తమయ్యాయి. అయితే, తాజాగా ఈ విషయంలో కోర్టు ఇచ్చిన తీర్పు అన్ని అనుమానాలకు తెరదించింది.

Parthiban

తనకు ఏ కులం, ఏ మతం లేదని ధృవీకరించే ‘నో క్యాస్ట్ – నో రిలీజియన్’ సర్టిఫికెట్‌ను మంజూరు చేయాలని పార్తిబన్ న్యాయస్థానాన్ని ఆశ్రయించారు. దీనిపై విచారణ చేపట్టిన కోర్టు, ఏప్రిల్ 29లోపు ఆయనకు సంబంధిత సర్టిఫికెట్‌ను జారీ చేయాలని అధికారులను ఆదేశించింది. ఈ తీర్పుపై పార్తిబన్ హర్షం వ్యక్తం చేస్తూ, ఇది తన వ్యక్తిగత విజయమే కాక, సమాజంలో మార్పును కోరుకునే వారికి ఒక ప్రేరణ అని పేర్కొన్నారు.

పవన్ కళ్యాణ్ నటించిన ‘ఉస్తాద్ భగత్ సింగ్’ సినిమా ఫ్రీ రిలీజ్ ఈవెంట్ వేదికపై పార్తిబన్ మాట్లాడుతూ, పొరపాటున ఒక కులం గురించి ప్రస్తావించారు. ఆ వ్యాఖ్యలు కొంతమందిని నొప్పించాయని తెలిసి ఆయన తీవ్రంగా కలత చెందారు. ఆ పశ్చాత్తాపంతోనే, తాను ఏ కులానికి లేదా మతానికి కట్టుబడి లేనని చాటిచెప్పేందుకు ఈ సర్టిఫికెట్ కోసం దరఖాస్తు చేసుకున్నట్లు వివరించారు.

ఈ సందర్భంగా పార్తిబన్ ప్రభుత్వానికి మరియు సమాజానికి కొన్ని కీలక సూచనలు చేశారు. ఒక సామాన్యుడు కులమతాలకు అతీతంగా ఉండాలనుకుంటే, ప్రతిసారి కోర్టుల చుట్టూ తిరగడం కష్టమని, ఈ సర్టిఫికెట్ల జారీ ప్రక్రియను ప్రభుత్వం సులభతరం చేయాలని కోరారు. అసలు ‘నో క్యాస్ట్’ సర్టిఫికెట్ ఒకటి ఉంటుందనే విషయం మెజారిటీ ప్రజలకు తెలియదని, దీనిపై అవగాహన పెంచాల్సిన అవసరం ఉందని అభిప్రాయపడ్డారు.

కులమతాల అడ్డుగోడలు లేని నూతన సమాజం కోసం పరితపించే వారిలో తాను ఎప్పుడూ ముందుంటానని ఆయన స్పష్టం చేశారు. పార్తిబన్ తీసుకున్న ఈ అడుగు, కేవలం భావోద్వేగంతో తీసుకున్న నిర్ణయం కాదని, సామాజిక మార్పు దిశగా వేసిన ఒక బలమైన అడుగు అని చెప్పొచ్చు. కుల వివక్ష లేని సమాజం కోసం ఆయన చేస్తున్న ఈ పోరాటం అందరినీ ఆలోచింపజేస్తోంది.

ఎన్టీఆర్ ప్రశాంత్ నీల్ సినిమా.. మరో విశ్వంబర అవుతుందా?