తొలిసారి పోలీస్ గా కనిపించనున్న నాని

ఓ మిడిల్ క్లాస్ కుటుంబం.. అందులో ఓ కుర్రోడు.. ఆ కుర్రోడికి చిన్న లవ్ స్టోరీ.. ఆ స్టోరీలో కొంచెం ప్రేమ.. మరికొంచెం కామెడీ.. అక్కడక్కడా సెంటిమెంట్.. చివర్లో చిరునవ్వుతో శుభం కార్డు. ఇలాంటి కథలతో నాని వరుసగా ఏడు విజయాలను అందుకున్నారు. ఒకేరకమైన పాత్రలు చేసి బోర్ కొట్టడంతో డిఫరెంట్ కథలకు ఒకే చెబుతున్నారు. కృష్ణార్జున యుద్ధం సినిమాలో డ్యూయల్ రోల్ పోషించి అదరగొట్టారు. సినిమా విజయం సాధించకపోయినప్పటికీ కొత్తతరహా పాత్రలకు ఒకే చెబుతున్నారు. ప్రస్తుతం నాగార్జునతో కలిసి మల్టీ స్టారర్ మూవీ చేస్తున్నారు. దేవదాస్ సినిమాలో డాక్టర్ దాస్ గా కనిపించబోతున్నారు. దీని తర్వాత “జెర్సీ” అనే స్పోర్ట్స్ నేపథ్యం ఉన్న సినిమాను చేయనున్నారు. “మళ్ళీ రావా” ఫేమ్ గౌతమ్ తిన్ననూరి దర్శకత్వంలో తెరకెక్కనున్న ఈ సినిమాలో మూడు షేడ్స్ చూపించబోతున్నారు.

తాజాగా దీని తర్వాత కథని కూడా ఓకే చెప్పినట్లు తెలిసింది. ఐతే, అనుకోకుండా ఒక రోజు, మనమంతా వంటి విభిన్నమైన కథలతో విజయాలను అందుకున్న చంద్రశేఖర్ యేలేటి ఓ మంచి కథని నానికి వినిపించారంట. కథ విన్న వెంటనే గ్రీన్ సిగ్నల్ ఇచ్చినట్లు సమాచారం. మైత్రీ మూవీస్ వారు నిర్మించనున్న ఈ మూవీ లైన్, కథ ఇంకా తెలియదు కానీ, ఈ సినిమాలో నాని పోలీస్ గా కనిపిస్తాడని తెలిసింది. ఇప్పటివరకు తెలుగు తెరపై కనిపించని విధంగా పోలీస్ రోల్ ని యేలేటి డిజైన్ చేసి ఉంటారని, ఆ పాత్రను నేచురల్ గా నాని పండిస్తారని అందరూ భావిస్తున్నారు. ఈ మూవీ వచ్చే ఏడాది పట్టాలెక్కే ఆస్కారం ఉంది.