టీవీకే పార్టీ అధినేత, ప్రముఖ తమిళ కథానాయకుడు విజయ్.. త్వరలో తమిళనాడు ముఖ్యమంత్రి అవ్వబోతున్నాడు. 108 స్థానాలతో తమిళనాట అతిపెద్ద పార్టీగా అవతరించిన టీవీకే తరఫున సీఎం అభ్యర్థి ఆయనే అనేది ప్రత్యేకంగా చెప్పక్కర్లేదు. అయితే మ్యాజిక్ ఫిగర్ 118కి ఓ పది సీట్ల దూరంలో ఆగిపోయాడు విజయ్. ఏదైతే ఏముంది తొలి ప్రయత్నంలో అదరగొట్టాడు. అయితే సినిమాల్లోకి ఆయన ఎంట్రీ అంత ఈజీగా సాగలేదు. తొలి ప్రయత్నం దారుణంగా దెబ్బకొట్టింది.
అందులో ఏముంది స్టార్ కదా, తండ్రి కూడా సినిమా పరిశ్రమకు చెందినవాడే.. వారసుడిగా అంతా సాఫీగా సాగి ఉంటుంది అనుకోవద్దు. ఎందుకంటే విజయ్ హీరోగా నటించిన తొలి సినిమా ఫ్లాప్. అవును మీరు చదివింది నిజమే. చిన్నప్పటి నుండి తండ్రిని చూసిన విజయ్ దృష్టి ఆటోమేటిగ్గా సినిమాల వైపు మళ్లింది. కానీ విజయ్ హీరో అవుతాడు అని అన్నప్పుడు తమిళ పరిశ్రమలో ‘ఇతనా నటుడిగానే పనికిరాడు… బండమొహం’ అంటూ ఎవరూ అవకాశాలు ఇవ్వలేదు.
దీంతో స్వతహాగా దర్శకుడు అయిన విజయ్ తండ్రి చంద్రశేఖర్ రూ.60 లక్షలు అప్పు చేసి మరీ విజయ్ని హీరో చేశారు. అలా చేసిన ‘నాళయ తీర్పు’ అనే సినిమా దారుణ పరాజయం పాలైంది. ఆ తర్వాత ఓ రెండు నెలలు ఫ్రెండ్స్ని కూడా కలవడానికి విజయ్ బయటకు వెళ్లలేదు. ఆ పరాభవం ప్రభావంతో తనను తాను నిరూపించుకోవాలని విజయ్ డ్యాన్స్పై దృష్టి పెట్టాడు. కరాటే నేర్చుకున్నాడు. ఆ తర్వాత ‘రసిగన్’ అనే సినిమా చేశాడు. 1994లో వచ్చిన ఈ సినిమా బ్లాక్బస్టర్.
పాలిటిక్స్లో విజయ్ విజయానికి కారణం ఆయన నిశ్శబ్దం అని కూడా అంటారు. తన మీద ఎన్ని విమర్శలు వచ్చినా.. ఎక్కడా తొణకకుండా తన పని తాను చేసుకుంటూ వెళ్లాడు. అదీ ఓ విన్నింగ్ పాయింటే అంటారు. అయితే విజయ్ ఇప్పుడు ఇంత కంపోజ్డ్గా ఉండటం వెనుక ఓ బలమైన కారణం ఉంది. విజయ్ చిన్నప్పుడు అందరు పిల్లల్లా అల్లరి చేసేవాడు. ఎప్పుడూ నవ్వుతూ, ఆట పట్టించేవాడు. కానీ, తన ప్రియమైన సోదరి విద్య మరణం తర్వాత విజయ్ పూర్తిగా మారిపోయాడు. అప్పుడు వచ్చిన కామ్నెస్ ఇప్పుడూ ఉంది
