ఇప్పుడు నెగిటివ్‌ షేడ్స్‌ ఉన్న హీరోయిన్స్‌ అంటే ‘ఆర్‌ఎక్స్‌ 100’, ‘బేబీ’ (Baby) లాంటి సినిమాల పేర్లు చెబుతారు కానీ.. ఒకప్పుడు అంటే 2000 కంటే ముందు ఇలాంటి హీరోయిన్‌కి, కథకు ఫేమస్‌ అయిన సినిమా ‘ఏ’. అవును ఉపేంద్ర సినిమా ‘ఏ’నే. ఈ సినిమాలో నెగిటివ్‌ షేడ్స్‌ ఉన్న హీరోయిన్‌గా చాందిని నటించి మెప్పించింది. ఈ సినిమా రీరిలీజ్‌ సందర్భంగా చాందిని మీడియాతో మాట్లాడింది. ఈ క్రమంలో ఆమె గురించి, సినిమా గురించి ఆసక్తికర వ్యాఖ్యలు చేసింది.
ఉపేంద్ర (Upendra) హీరోగా 1998లో వచ్చిన కన్నడ సినిమా ‘ఏ’. ఆ సినిమా కన్నడ నాట సాధించిన విజయం చూసి.. తెలుగులో అదే పేరుతో అనువదించి రిలీజ్‌ చేశారు. అక్కడ ఎంతటి విజయం సాధించిందో, ఇక్కడా అంతే విజయం సాధించింది. ఇప్పటికీ ఉపేంద్ర అనగానే ‘ఏ’ సినిమానే గుర్తొస్తుంది అంటే ఆ సినిమా ఎలాంటి ఎఫెక్ట్‌ చూపించిందో అర్థం చేసుకోవచ్చు. ఇప్పుడు ఈ సినిమా 26 ఏళ్ల తర్వాత రీరిలీజ్‌ అయింది. శుక్రవారం నుండి ‘ఏ’ సినిమా థియేటర్లలో మళ్లీ సందడి చేస్తోంది.
ఈ సందర్భంగా చాందిని ఓ ఇంటర్వ్యూలో ‘ఏ’ సినిమా చిత్రీకరణ నాటి జ్ఞాపకాలను గుర్తుచేసుకుంది. చదువుకునే రోజుల్లోనే తనకు ‘ఏ’ సినిమా అవకాశం వచ్చిందని చెప్పిన ఆమె.. ఆ సినిమా తన జీవితాన్ని మార్చేసింది అని చెప్పుకొచ్చింది. హీరోయిన్‌ పాత్ర పాజిటివ్‌, నెగెటివ్‌ ఛాయలున్న క్యారెక్టర్‌ కావడంతో చాలామంది అమ్మాయిలను ఆ పాత్ర కోసం చూశారట. అయితే ఎంతోమంది అమ్మాయిల ఫొటోలు చూసినా దర్శకుడు ఉపేంద్రకు నచ్చలేదని, ఆర్టిస్ట్‌ విషయంలో రాజీ పడకూడదనే ఉద్దేశంలోనే చాలామందిని పరిశీలించారని చాందిని చెప్పింది.
అయితే ఆయనకు తెలిసిన వాళ్ల ద్వారా చాందిని ఫొటోలు చేరాయట. ఫొటోల్లో చూసి నేరుగా సినిమా ఛాన్స్ ఇచ్చేశారట ఉపేంద్ర. కనీసం తనను సినిమా షూటింగ్‌కి ముందు చడను కూడా చూడలేదు అని చాందిని చెప్పింది. అంతలా ఆమె ఆ పాత్రకు సరిపోతుందని ఉపేంద్ర భావించారట. అయితే, ఇక్కడో విషయం ఏంటంటే.. చాందిని ఇప్పటివరకు పెళ్లి చేసుకోలేదు. ఎందుకు అని అడిగితే.. ‘పెళ్లిపై నాకు నమ్మకం ఉంది. అందుకే నేను ఇంకా పెళ్లి చేసుకోలేదు’’ అని చెప్పింది.
Home