పుట్టిన రోజు సందర్భంగా అభిమాన హీరో టీజర్‌ వస్తే ఫ్యాన్స్ చాలా హ్యాపీ ఫీలవుతారు. అందులో హీరో కనిపిస్తే ఆ ఆనందానికి అవధులు ఉండవు. అలాంటిది ఆ టీజర్‌లో హీరో డబుల్‌ యాక్షన్‌లో కనిపిస్తే.. డబుల్‌ ట్రీట్‌ వచ్చినట్లేగా. ఇప్పుడు ఇదే ఆనందాన్ని ఎంజాయ్‌ చేస్తున్నారు విజయ్ (Thalapathy Vijay) ఫ్యాన్స్. వెంకట్ ప్రభు (Venkat Prabhu) దర్శకత్వంలో విజయ్ హీరోగా తెరకెక్కుతున్న చిత్రం ‘ది గోట్’ (GOAT) . ది గ్రేటెస్ట్‌ ఆఫ్‌ ఆల్‌ టైమ్‌ అనేది సినిమా ఉప శీర్షిక.
శనివారం విజయ్ జన్మదినం సందర్భంగా సినిమా బృందం ప్రత్యేక వీడియోను షేర్‌ చేసింది. డైలాగ్స్‌ లేకుండా కేవలం యాక్షన్ సన్నివేశాలనే హైలైట్‌ చేస్తూ టీజర్‌ను తీర్చిదిద్దారు. ఆ వీడియోలో డబుల్‌ రోల్‌లో కనిపించి ఫ్యాన్స్‌కు ట్రీట్‌ ఇచ్చారని చెప్పాలి. టైం ట్రావెల్ కాన్సెప్ట్‌తో రూపొందిన ‘గోట్’ సినిమాలో విజువల్ ఎఫెక్ట్స్‌కి ప్రాధాన్యం ఉందని ఇప్పటికే వార్తలొచ్చాయి. టీజర్‌లో అవి స్పష్టంగా కనిపించాయి కూడా. నిమిషం నిడివి ఉన్న వీడియోలో ఇద్దరు విజయ్‌లు విదేశాల్లో బైకు మీద వెళ్తుండగా వెనకాల వందలాది గూండాలు, పోలీసులు వెంటాడుతుంటారు.
ఈ సినిమాలో విజయ్ వయసు తక్కువగా కనిపించడం కోసం ప్రత్యేక మేకప్ వేశారట. దాంతోపాటు డీఏజినింగ్‌ టెక్నాలజీని కూడా వినియోగించారు. దీని కోసం చిత్రబృందం ఏడేనిమిది కోట్ల రూపాయలు ఖర్చు పెట్టారని సమాచారం. టీజర్‌ చివరి 5 సెకన్లలో చాలా డీటెయిల్స్‌ పెట్టారు దర్శకుడు వెంకట్ ప్రభు. టీజర్‌లోని ఓ షాట్‌లో 2050 సంవత్సరం కనిపిస్తుంది. అంటే టైమ్‌ ట్రావెల్‌లో అక్కడి వరకు వెళ్తారు అని చెప్పొచ్చు.
ఈ కంటెంట్‌ అంతా చూశాక నాగచైతన్య (Naga Chaitanya) ఫ్యాన్స్ మాత్రం చాలా చిరాకుగా ఉన్నారు అని చెప్పాలి. ఇలాంటి కంటెంట్‌తో సినిమా చేయగలిగే దర్శకుడు చైతుతో ‘కస్టడీ’ (Custody) లాంటి డిజాస్టర్‌ ఎందుకు తీశారు అని ప్రశ్నిస్తున్నారు. ఇక ‘గోట్’ సినిమాలో దివంగత స్టార్‌ హీరో విజయకాంత్‌ కూడా ఉన్నారు. ఆర్టిఫిషియల్‌ ఇంటెలిజెన్స్‌ (ఏఐ) ద్వారా ఆయనను మళ్లీ తెరపై చూపించబోతున్నారు ఆయన ఫ్యాన్స్ అయిన వెంకట్ ప్రభు, విజయ్.
Home
