Nabha Natesh: నభా నటేశ్‌లో ఈ కళ కూడా ఉంది.. చెయ్యి మ్యాజిక్‌ చేస్తోంది!

‘ఇస్మార్ట్‌ శంకర్‌’ (iSmart Shankar) సినిమాతో మెరుపులా వచ్చి… మైమరిపించి వరుస ఛాన్స్‌లు కొట్టేసింది నభా నటేశ్‌ (Nabha Natesh) . కుర్ర స్టార్‌ హీరోలకు తగ్గ ఫిగర్‌, బ్యూటీతో మంచి పేరు తెచ్చుకుంటుంది అని అనుకున్నారంతా. అయితే ప్రమాదవశాత్తు గాయాలపాలై సినిమా పరిశ్రమకు దూరమైంది. అయితే ఇప్పుడు మళ్లీ తన కెరీర్‌ను ప్రారంభిస్తోంది. గత కొన్ని రోజులుగా సినిమా ఛాన్స్‌ల కోసం ప్రయత్నం చేసినా ఆమె ఇప్పుడు మూడు సినిమాలతో బిజీగా ఉంది. ఈ క్రమంలో తన గురించి కొన్ని విషయాలు చెప్పింది.

నభా నటేశ్‌.. నటనలో, బాడీ లాంగ్వేజ్‌ నేటి తరం కుర్రాళ్లు మెచ్చే అంశాలు చాలానే ఉంటాయి. అంతేకాదు ఆమె అలవోకగా చిత్రాలు గీయగల సృజనశీలి కూడా. తనకు మానసిక ప్రశాంత వచ్చేది కూడా ఆ పెయింటింగ్స్‌ వల్లనే అని చెప్పింది కూడా. బొమ్మలు గీయడం అంటే కళ మాత్రమే కాదు.. నా దృష్టిలో అది ఇబ్బందుల్లో ఒక సాంత్వన లాంటిది. బాధల నుండి ఉపశమనం కలిగించే ఓ సాధనం నా చిత్రలేఖనం అని చెప్పింది. తనకు ఈ కళ థెరపీ లాంటిది అని కూడా తెలిపింది.

ఏకాగ్రత పెరగడానికి తనకు చిత్రలేఖనం కళే ఎంతగానో తోడ్పడుతోందని, రంగులతో ప్రయోగాలు చేయడాన్ని ఇష్టపడతానని తెలిపింది. తనకు ఈ ఆసక్తి చిన్నతనంలోనే మొదలైంది అని చెప్పిన నభా… పెయింటింగ్‌తో తన అనుబంధం చిన్నప్పుడే మొదలైందని కూడా చెప్పింది. రకరకాల కళలు నేర్చుకోవాలనే ఉత్సాహం చిన్నతనం నుండే తనకు ఉండేదని, అలా రంగుల పెన్సిళ్లు, బ్రష్‌లు, షీట్లు సేకరించి సొంతంగా ప్రయోగాలు చేసేదానినని తెలిపింది.

ఇప్పుడు అదే ఇష్టమైన వ్యాపకంగా మారిందని చెప్పిన నభా.. పెయింటింగ్‌లో క్రియేటివిటీ, కొత్తదనం కోసం అన్వేషించే గుణం, ఏదో చేయాలనే తపన ఉంటాయి అని చెప్పింది. చార్లీ చాప్లిన్‌, బ్యాట్‌మన్‌ లాంటి పెయింటింగ్స్‌కి మంచి ఆదరణ ఉంది అని అంటుంటారు. సోషల్‌ మీడియాలో ఆమె షేర్‌ చేసిన ఫొటోలకు మంచి స్పందన వస్తోంది. ఇప్పుడు నభా ‘డార్లింగ్‌’, ‘స్వయంభూ’ (Swayambhu) తదితర చిత్రాల్లో నటిస్తోంది.