Aditya Haasan: ఆదిత్య హాసన్‌.. కుర్ర ‘బాహుబలి’ కలుస్తున్నారు.. ఏం చేయబోతున్నారో?

తెలుగు సినిమాల్లో ఇటీవల దూసుకొచ్చిన యువ కెరటం ఆదిత్య హాసన్‌  (Aditya Haasan) . ‘90స్‌’ (90’s – A Middle-Class Biopic) వెబ్‌ సిరీస్‌తో ఈటీవీ విన్‌కు ఆల్‌టైమ్‌ రికార్డు వెబ్‌ సిరీస్‌ అందిచారు. ఆ సిరీస్‌ ఎంతగా నచ్చేసింది అంటే… 90స్‌ కిడ్స్‌, 80స్‌ కిడ్స్‌ కూడా కనెక్ట్‌ అయి నాటి రోజులకు వెళ్లిపోయారు. ఆ తరం వాళ్లకే ఆకట్టుకునేలా రాస్తారేమో ఆయన అనుకుంటుండగా… కాదు కాదు నేటి తరానికి కనెక్ట్‌ అయ్యేలా రాస్తాను అని ‘ప్రేమలు’ (Premalu) సినిమాతో నిరూపించారు. నేటి తరం కుర్రాళ్లకు నచ్చేలా రాశారు.

ఇప్పుడు ఆయన కొత్త ప్రాజెక్ట్‌కు సర్వం సిద్ధమైందట. ఈ రోజు సాయంత్రం ఆదిత్య హాసన్‌ కొత్త ప్రాజెక్ట్ అనౌన్స్‌ చేస్తున్నారు. సిరీస్‌గా తెరకెక్కబోతున్న ఈ ప్రాజెక్ట్‌లో నిఖిల్ దేవాదుల ప్రధాన పాత్రలో నటిస్తున్నాడట. నిఖిల్‌ అంటే మనకు ఇప్పటికే పరిచయం ఉన్న పేరే. ‘బాహుబలి’ (Baahubali) సినిమాలో బాల ‘బాహుబలి’గా నటించింది నిఖిలే. ఆ సినిమాలో పాత్ర నిడివి చిన్నదే అయినా చక్కగా నటించాడు. ఆ తర్వాత కూడా కొన్ని మంచి పాత్రలు చేశాడు.

ఇప్పుడు ఆ కుర్రాడితోనే ఆదిత్య హాసన్‌ కొత్త ప్రాజెక్ట్‌ ఓకే చేసుకున్నారు అంటున్నారు. ఈ సిరీస్‌కు అజీమ్ మహమ్మద్ సంగీతం అందిస్తున్నారట. ఇక ‘90s’ సిరీస్‌ను దగ్గరుండి నిర్మించిన నవీన్ మేడారం (Naveen Medaram) ఈ సిరీస్‌కు కూడా నిర్మాత అట. ఓటీటీ పార్ట్‌నర్‌ విషయంలోనూ ఇప్పటికే డీల్స్‌ పూర్తయయ్యాయని సాయంత్రానికి పూర్తి వివరాలు తెలుస్తాయి అని చెబుతున్నారు. మరి ఎందులో సిరీస్‌ వస్తుంది, ఎలా ఉండబోతోంది అనే వివరాలు కూడా చెబుతారు అని అంటున్నారు.

‘90s’ సిరీస్‌లో ఆదిత్య రైటింగ్‌ స్టైల్‌ను నిన్నటి తరం యువకులు ఫిదా అయ్యారు. ఇక ‘ప్రేమలు’ తెలుగు వెర్షన్‌ రైటింగ్‌కి నేటితరం యూత్‌ కనెక్ట్ అయిపోయారు. ఇప్పుడు రానున్న ఈ సిరీస్‌లో ఏం జరుగుతుంది, ఎవరు ఎంతలా కనెక్ట్ అవుతారు అనేది చూడాలి. ఒకవేళ క్లిక్‌ అయితే ఆదిత్య హాసన్‌ గ్రాఫ్ ఇంకాస్త పెరుగుతుంది అని చెప్పొచ్చు.