Akhil Akkineni Fan: నం.1 అభిమానిని కలిసిన అయ్యగారు.. వీడియో వైరల్‌!

July 16, 2026 / 12:25 PM ISTByFilmy Focus Desk

Join Us

‘అయ్యగారే నం.1..’ అంటూ గత కొన్ని ఏళ్లుగా ఓ అభిమాని సోషల్‌ మీడియాలో సందడి చేస్తూనే ఉన్నాడు. కొన్ని రోజులు ఈ సందడిని ఫ్యాన్స్‌ ఎంజాయ్‌ చేయగా.. ఇంకా అఖిల్‌కి (Akhil) సరైన విజయం వస్తుండకపోవడంతో ఆ మాట కాస్తా ట్రోలింగ్‌ మెటీరియల్‌ అయిపోయింది. అయితే ఇప్పుడు తొలిసారి ఆ మాటకు తగ్గ విజయం అందుకున్నాడు అఖిల్‌. అంతేకాదు తనకు ‘అయ్యగారే నం. 1’ అనే ట్యాగ్‌లైన్‌ ఇచ్చిన వీరాభిమాని నాగరాజును ఇప్పుడు అఖిల్‌ కలుసుకున్నాడు. దీనికి సంబంధించిన వీడియో ఇప్పుడు సోషల్‌ మీడియాలో వైరల్ అవుతోంది.

Akhil Akkineni

బుధవారం గుంటూరులో జరిగిన ‘లెనిన్‌’ సక్సెస్ మీట్ తర్వాత వీరాభిమాని నాగరాజును తన దగ్గరకు అఖిల్‌ పిలిపించుకుని కలిశాడు. తనపై కాళ్లపై నాగరాజు పడబోగా వారించిన అఖిల్‌.. నాగరాజును హగ్ చేసుకున్నారు. ‘నీ వల్లే అయ్యగారే నం. 1 అనే పేరు నాకు వచ్చింది. మళ్లీ హిట్ కొడదాం’ అని నాగరాజుతో అఖిల్ చెప్పడం ఆ వీడియోలో చూడొచ్చు. అలాగే తన ఆనంభాష్పాలతో అఖిల్‌ను ప్రేమలో ముంచెత్తాడు నం.1 అభిమాని. ఆ ఎమోషనల్‌ మూమెంట్‌ సమయంలో అఖిల్‌ భార్య జైనబ్‌ కూడా అక్కడే ఉన్నారు.

సక్సెస్‌ మీట్‌సమయంలో కూడా ఇలాంటి మూమెంటే జరిగింది. సక్సెస్ మీట్‌లో అఖిల్ భార్య జైనబ్ రవ్‌జీ స్పెషల్ అట్రాక్షన్‌గా నిలిచారు. ‘లెనిన్’ సినిమా సక్సెస్‌పై ఆమె హర్షం వ్యక్తం చేశారు. సినిమా టీంకు కంగ్రాట్స్ చెబుతూ.. ‘అయ్యగారే నం.1’ అని అనడంతో ఫ్యాన్స్ కేరింతలు, నినాదాలతో సభా ప్రాంగణం హోరెత్తిపోయింది.

Lenin Movie Review and Rating

జులై 10న విడుదలైన ఈ సినిమా ఇప్పటివరకు రూ.75 కోట్లకు పైగా వసూళ్లను సాధించినట్లు తెలుస్తోంది. సెకండ్ వీక్‌లో రూ.100 కోట్ల క్లబ్‌లో చేరుతుందని సమాచారం. ‘వినరో భాగ్యము విష్ణుకథ’ సినిమా ఫేం మురళీ కిశోర్ అబ్బూరు దర్శకత్వం వహించిన ఈ సినిమాలో భాగ్యశ్రీ బోర్సే హీరోయిన్‌. అన్నపూర్ణ స్టూడియోస్, సితార ఎంటర్టైన్మెంట్స్ నిర్మించాయి.