స్టైలిష్ స్టార్ అల్లు అర్జున్ “చెప్పను బ్రదర్” అనే మాటా ప్రభావమో, తన ఎంచుకున్న కథల ప్రభావమో తెలియదు గానీ సరైనోడు తర్వాత అతను చేసిన రెండు చిత్రాలు విజయం సాధించలేకపోయాయి. దువ్వాడ జగన్నాథం కొంత ఫరవాలేదనిపించినా… వక్కంతం వంశీ దర్శకత్వంలో చేసిన నా పేరు సూర్య మాత్రం ఘోరపరాజయం పాలైంది. దీంతో కథల ఎంపికలో కాస్త జాగ్రత్త పడ్డారు. అంతేకాదు పూర్తి స్క్రిప్ట్ విన్నతర్వాతనే సినిమాకి ఒకే చెప్పారు. విక్రమ్ కె కుమార్ చెప్పిన కథ నచ్చడంతో అతనికి గ్రీన్ సిగ్నల్ ఇచ్చారు. స్క్రిప్ట్ నచ్చకపోవడంతో మళ్ళీ మళ్ళీ రాయించారు.
రీసెంట్ గా అతని ఇచ్చిన స్క్రిప్ట్ కి సంతృప్తి చెందిన అల్లు అర్జున్ ఇక సినిమా మొదలు పెట్టమని గ్రీన్ సిగ్నల్ ఇచ్చారు. విక్రమ్ కుమార్ ఆర్టిస్టుల సెలక్షన్స్ మొదలు పెట్టగా.. బన్నీ మాత్రం ఈ సినిమాలోనూ కొత్తగా కనిపించడానికి కసరత్తులు షురూ చేశారు. ప్రముఖ స్టయిలిస్ట్ సలహా మేరకు హెయిర్ స్టైల్, లుక్ మారుస్తున్నారు. యాక్షన్ ఎంటర్టైనర్ గా తెరకెక్కనున్న ఈ సినిమాని రేస్ గుర్రం నిర్మాత నల్లమలుపు బుజ్జి, సరైనోడు ఎగ్జిక్యూటివ్ ప్రొడ్యూసర్ నాగ అశోక్ కుమార్ కలిసి నిర్మిస్తున్నారు. మెయిన్ ఆర్టిస్టులు, టెక్నీషియన్ల ఎంపిక పూర్తి కాగానే ఈ చిత్ర వివరాలను అధికారికంగా ప్రకటించనున్నారు.
