తన కొత్త సినిమాపై క్లారిటీ ఇచ్చిన అల్లు అర్జున్

ఎన్నో అంచనాలతో వచ్చిన “నా పేరు సూర్య” సినిమా అల్లు అర్జున్ అభిమానులను తీవ్ర నిరాశ పరిచింది. ఈ సినిమా తర్వాత బన్నీ ఎవరితో సినిమా చేస్తున్నారని తెలుసుకోవాలని ఫాన్స్ లో ఆరాటం పెరిగింది. ఇంకా అల్లు అర్జున్ ఏ ప్రాజక్ట్ ని ప్రకటించకపోవడంతో అసహనం కలిగింది. దీంతో రకరకాల గాసిప్స్ పుట్టుకొస్తున్నాయి. విక్రమ్ కె కుమార్ దర్శకత్వంలో అల్లు అర్జున్ సినిమా చేస్తున్నారని, అందుకు ఆస్కార్ అవార్డు గ్రహీత ఏ ఆర్ రెహమాన్ సంగీతమందిస్తున్నట్టు వార్తలు చక్కర్లు కొట్టాయి. వీటిని నమ్మాలో.. నమ్మకూడదో తెలియక అభిమానులు కొంచెం కన్ఫ్యూజ్ అయ్యారు. ఈ విషయం తెలుసుకున్న అల్లు అర్జున్ స్పందించారు.

సోషల్ మీడియా వేదికపై తన నెక్స్ట్ సినిమా విషయంలో క్లారిటీ ఇచ్చారు. “మై డియర్ ఫ్యాన్స్… మీరు చూపుతున్న ప్రేమాభిమానాలకు కృతజ్ఞతలు. నా తదుపరి సినిమా ప్రకటన గురించి ఓపికగా ఉండండి. ఎందుకంటే అది ఇంకాస్త సమయాన్ని తీసుకోవచ్చు. ఓ మంచి చిత్రాన్ని మీకందించాలని చూస్తున్నాను. కొంత సమయం పడుతుంది. అర్థం చేసుకున్నందుకు ధన్యవాదాలు” అని ట్వీట్ చేశారు. దీంతో బన్నీ కొత్త సినిమాపై వస్తున్న రూమర్లకు తెరపడింది. అతని సినిమా ప్రకటనకు మరికొంతకాలం పడుతుందని అర్ధమయింది.