అమెరికాలో పుట్టి పెరిగిన అను ఇమ్యానుల్ టాలీవుడ్ లో క్రేజీ హీరోయిన్ గా మారింది. తొలిసారి మజ్ను సినిమాలో నాని సరసన ముద్దుగా నటించిన ఈ భామ వెంటనే మంచి ఆఫర్లను పట్టేసింది. “కిట్టు ఉన్నాడు జాగ్రత్త” సినిమాతో పాటు పవర్ స్టార్ పవన్ కళ్యాణ్ కి జోడీగా ఛాన్స్ అందుకుంది. త్రివిక్రమ్ దర్శకత్వంలో తెరకెక్కుతోన్న అజ్ఞాతవాసి జనవరి 10 న రిలీజ్ కానుంది. ఈ సినిమా రిలీజ్ కాకముందే రచయిత వక్కంతం వంశీ దర్శకత్వంలో “నా పేరు సూర్య నా ఇల్లు ఇండియా” అనే చిత్రంలో హీరోయిన్ గా అవకాశం అందుకుంది. ఇలా తక్కువ సమయంలోనే ఇద్దరు మెగా హీరోల సరసన నటించింది.
తాజాగా మరో మెగా హీరోతో ఆడిపాడే ఛాన్స్ అందుకుంది. మెగా పవర్ స్టార్ రామ్ చరణ్ తేజ్ రంగస్థలం 1985 తర్వాత మాస్ డైరక్టర్ బోయపాటి దర్శకత్వంలో సినిమా చేయనున్నారు. ఈ యాక్షన్ ఎంటర్టైనర్ లో కథానాయికగా అను ఎమ్మాన్యుయేల్ ను హీరోయిన్ గా తీసుకునే ఆలోచనలో హీరో, డైరక్టర్ ఉన్నట్లు తెలిసింది. డీవీవీ దానయ్య నిర్మించనున్న ఈ సినిమాలో హీరోయిన్ గా మొదట రాశిఖన్నా, రకుల్ ప్రీత్ సింగ్ పేర్లు పరిశీలించారు. అయితే వారిద్దరూ నటించిన సినిమాలు ఈ మధ్య బోల్తా కొడుతుండడంతో అను ని ఎంపిక చేసినట్లు ఫిలిం నగర్ వాసులు చెబుతున్నారు. త్వరలో ఈ విషయాన్నీ అధికారికంగా ప్రకటించనున్నారు.
