మలయాళ భామ అనుపమ పరమేశ్వరన్ అతి తక్కువ సినిమాలతోనే ఎక్కువమంది అభిమానులను సంపాదించుకుంది. అ..ఆ , ప్రేమమ్, శతమానం భవతి వంటి విజయాలను అందుకున్న భామ “నేను లోకల్” ఫేమ్ త్రినాధరావు నక్కి దర్శకత్వంలో “హలో గురు ప్రేమ కోసమే” సినిమా చేస్తోంది. ఆరోగ్యం కొన్నిసార్లు సహకరించకపోయినా సినిమా షూటింగ్ ని అనుకున్న సమయానికి కంప్లీట్ చేసింది. ఎనర్జిటిక్ హీరో రామ్ హీరో గా తెరకెక్కుతున్న ఈ మూవీ టీజర్ లో మరింత అందంగా కనిపించి అదరగొట్టింది. ప్రస్తుతం ఈ మూవీ పోస్ట్ ప్రొడక్షన్ పనులు జోరుగా సాగుతున్నాయి. ఈ రోజు అనుపమ తన పాత్రకు డబ్బింగ్ మొదలు పెట్టింది.
ఇందులో అనుపమ ఇంజనీరింగ్‌ స్టూడెంట్‌ గా కనిపించనున్నట్టు సమాచారం. అనుపమ కోసం రామ్ కాలేజీ చుట్టూ ప్రదక్షణలు చేస్తూ.. ఆమెను ప్రేమలో దించే సన్నివేశాలు చాలా బాగా వచ్చాయని చిత్ర బృందం చెప్పింది. పైగా రామ్, అనుపమ ఈ చిత్రంలో బావ మరదలు కావడంతో కెమిస్ట్రీ బాగా పండిందని తెలిసింది. కేవలం ప్రేమ సన్నివేశాలు మాత్రమే కాకుండా… ప్రకాశ్‌రాజ్‌, రామ్ కి మధ్య వచ్చే సన్నివేశాలు ప్రేక్షకులను చాలా బాగా అలరిస్తాయని టాక్. నేను శైలజ సినిమా తర్వాత రామ్ రెండు అపజయాలను చూసుకున్నారు. అందుకే ఈసారి హిట్ సాధించాలని కష్టపడుతున్నారు. దసరా కానుకగా అక్టోబర్‌ 18న థియేటర్లోకి రానున్న ఈ మూవీ యువతతో పాటు కుటుంబ ప్రేక్షకులను ఆకట్టుకుందని సినీవిశ్లేషకులు అంచనా వేస్తున్నారు.
Home