సోగ్గాడు అనగానే ఠక్కున మదిలో మెదిలేది అలనాటి అందగాడు శోభన్ బాబు. ఆ తర్వాత ‘సోగ్గాడు చిన్ని నాయన’ సినిమాతో నాగ్ కూడా ఆ పేరుని తన ఖాతాలో వేసుకున్నారు. అప్పట్లో తరుణ్ కూడా ఇలా పిలిపించుకునే ప్రయత్నం చేసినా అది సరైన ఫలితం ఇవ్వలేదు. ఆ విషయం అలా ఉంచితే టాలీవుడ్ తాజా ‘సోగ్గాడు’ అవసరాల శ్రీనివాస్. నటుడిగా, దర్శకుడిగా తన ప్రతిభను చాటిన ఈ యువరత్నం త్వరలో ‘సోగ్గాడు’గా తెరమీదికి రానున్నాడు.
నటుడిగా ‘అఆ’, దర్శకుడిగా ‘జ్యో అచ్యుతానంద’ సినిమాతో ఈ ఏడాది విజయాలు అందుకున్న అవసరాల శ్రీనివాస్ ఓ హిందీ సినిమా రీమేక్ చేస్తున్న సంగతి తెలిసిందే. బాలీవుడ్ అడల్ట్ కామెడీ ‘హంటర్’కి రీమేక్ గా రూపొందుతున్న ఈ సినిమాతో నవీన్ మేడారం దర్శకుడిగా పరిచయం అవుతున్నాడు. ఈ సినిమా షూటింగ్ దాదాపు పూర్తి కావచ్చిందిట. అంచేత డిసెంబర్ లోనే సినిమాని థియేటర్లోకి తీసుకురావడానికి దర్శక నిర్మాతలు సన్నాహాలు చేస్తున్నారు. శ్రీముఖి, తేజస్వి కీలక పాత్రలు పోషిస్తున్న ఈ సినిమాలో శ్రీని సెక్స్ అడిక్ట్ గా కనపడనున్నాడు. ఈ ప్రయోగం శ్రీనికి ఎలాంటి ఫలితాన్నిస్తుందో చూడాలి.
Also, do SUBSCRIBE to our YouTube channel to get latest Tollywood updates.
