మెగా ఫ్యామిలీ నుంచి పదో హీరో వస్తున్న సంగతి తెలిసిందే. సాయి ధరమ్ తేజ్ తమ్ముడు వైష్ణవ్ తేజ్ హీరోగా ఎంట్రీ ఇవ్వబోతున్నారు. ప్రస్తుతం డ్యాన్స్, నటనలో శిక్షణ తీసుకుంటున్న ఇతను త్వరలో కెమెరా ముందుకు రాబోతున్నారు. ఈ యువ హీరో ని యువ దర్శకుడు హీరోగా పరిచయం చేయబోతున్నారు. ఊహలు గుసగుసలాడే, జ్యో అచ్యుతానంద వంటి చిత్రాలతో విజయాలను అందుకున్న అవసరాల శ్రీనివాస్ వైష్ణవ్ తేజ్ మంచి కథని సిద్ధం చేస్తున్నట్లు ఫిలిం నగర్ వాసులు చెప్పారు. నేటి యువతని ఆకట్టుకునే విధంగా ఈ స్క్రిప్ట్ ఉంటుందని వివరించారు. ఈ పనిలో ఉన్న అవసరాల మాట్లాడుతూ “స్క్రిప్ట్ ఇంకా కొలిక్కి రాలేదు.
అది కంప్లీట్ కాగానే హీరో ఎవరనేది అధికారికంగా వెల్లడిస్తాను” అని వివరించారు. ఇక ఈ మెగా హీరో సినిమాని కూడా నిర్మించడానికి సాయి కొర్రపాటి ఉత్సాహంగా ఉన్నారు. ప్రస్తుతం మెగాస్టార్ చిరంజీవి చిన్న అల్లుడు కళ్యాణ్ దేవ్ ని తన బ్యానర్లో లాంచ్ చేయడానికి అన్ని ఏర్పాట్లు పూర్తి చేశారు. త్వరలోనే ఈ మూవీ సెట్స్ పైకి వెళ్లనుంది. అనంతరం వైష్ణవ్ తేజ్ మూవీ ప్రారంభం కానుంది. అవసరాల డైరక్టర్ గా ఫామ్లో ఉన్నారు.. సాయి కొర్రపాటి ప్రొడ్యూసర్ గా సక్సస్ బాటలో ఉన్నారు. వీరిద్దరి చేతుల్లో తమ తమ్ముడు లాంచ్ అయితే బాగుంటుందని సాయి ధరమ్ తేజ్ ఈ నిర్ణయం తీసుకున్నట్లు ఫిలిం నగర్ వాసులు చెప్పారు.
