అల్యూమినియం ఫ్యాక్టరీలో బాహుబలి క్లైమాక్స్

బాహుబలి – ది బిగినింగ్ విజయం ఆ చిత్ర బృందానికి మరింత ఉత్సాహాన్ని ఇచ్చింది. ఆ సినిమాకంటే అన్నివిషయాల్లో బాహుబలి – ది కంక్లూజన్ మెరుగ్గా ఉండాలని ఎస్.ఎస్. రాజమౌళి టీం శ్రమిస్తోంది. రామోజీ ఫిలిం సిటీలో వేసిన భారీ సెట్స్ లో యుద్ధ సన్నివేశాలను చిత్రీకరించడానికి వంద మందికి పైగా వీఎఫ్ఎక్స్ నిపుణులు కసరత్తు చేస్తున్నారు. పోరాటానికి సైన్యం బయలు దేరేముందు లీడ్ సీన్ ను హైదరాబాద్ శివార్లలోని అల్యూమినియం ఫ్యాక్టరీలో షూట్ చేస్తున్నారు. ఇక్కడ పూర్తి అయిన వెంటనే రామోజీ ఫిలిం సిటీలో యుద్ధం షూట్ మొదలవుతుంది.

అమరేంద్ర బాహుబలిని కట్టప్ప ఎందుకు చంపాడు? అనే ప్రశ్నకు సమాధానమిచ్చే బాహుబలి ది కంక్లూజన్ కోసం అభిమానులందరూ ఎదురు చూస్తున్నారు. వారి అంచనాలకు తగ్గకుండా ప్రభాస్, రానా, అనుష్క, తమన్నా, సత్యరాజ్, రమ్య కృష్ణ, నాజర్, ఇతర నటీనటులు నటిస్తున్నారు. ఎం.ఎం.కీరవాణి ఈ సినిమా కోసం కూడా మంచి స్వరాలను అందించారని సమాచారం. ఈ సారి ప్రపంచ వ్యాప్తంగా, ఆయా ప్రాంతీయ భాషల్లో చిత్రాన్ని ఒకే సారీ రిలీజ్ చేయడానికి చిత్రబృందం ప్లాన్ చేస్తోంది.