తెలుగు జాతి గర్వించదగ్గ నటుడు, నాయకుడు నందమూరి తారకరామారావు జీవిత గాథని నేటి తరలవారు తెలుసుకునే విధంగా క్రిష్ అతని బయోపిక్ ని తెరకెక్కిస్తున్నారు. ఇందులో ఎన్టీఆర్ గా బాలకృష్ణ నటిస్తున్న సంగతి తెలిసిందే. ఇక ఎన్టీఆర్ తో పోటీపడ్డ నటుడిగా అక్కినేని నాగేశ్వరరావుకి పేరుంది. అతనిలా సుమంత్ నటిస్తున్నారు. వీరిద్దరూ ఎన్టీఆర్, ఏఎన్నార్ లాగా కనిపించి ఆశ్చర్య పరిచిన సంగతి తెలిసిందే. అయితే సినిమాలో వీరిద్దరూ ఒక గెటప్ లోనే కాదు.. అనేక వేషాల్లో కనిపించనున్నారని తెలిసింది. ఎన్టీఆర్ 60 గెటప్‌లు, ఏఎన్నార్ 8 గెటప్‌లు సినిమాలో చూడవచ్చని సమాచారం.
వారి హిట్ చిత్రాల్లోని గెటప్ లను ఇందులో చూపించనున్నారు. ఎన్టీఆర్ భార్య బసవతారకం పాత్రను బాలీవుడ్ నటి విద్యాబాలన్ పోషిస్తున్న ఈ మూవీ షూటింగ్ ని నవంబర్ నాటికీ పూర్తి చేయాలనీ క్రిష్ విశ్రాంతి లేకుండా పనిచేస్తున్నారు. ఎం.ఎం. కీరవాణి ఈ చిత్రానికి మధురమైన పాటలని అందించే పనిలో ఉన్నారు. బాలకృష్ణ తో పాటు సాయి కొర్రపాటి, విష్ణు సంయుక్తంగా నిర్మిస్తున్న ఈ సినిమాని సంక్రాంతికి రిలీజ్ చేయనున్నారు. ఎంతోమంది స్టార్స్ నటిస్తున్న ఈ సినిమాపై భారీ అంచనాలున్నాయి.
