నందమూరి బాలకృష్ణ (Nandamuri Balakrishna) హీరోగా, బాబీ (Bobby) దర్శకత్వంలో రూపొందుతున్న పీరియాడికల్ యాక్షన్ డ్రామా డాకు మహారాజ్ (Daaku Maharaaj) సంక్రాంతి పండుగ సందర్బంగా ప్రేక్షకుల ముందుకు రాబోతోంది. రియల్ లైఫ్ బందిపోటు కథ ఆధారంగా రూపొందుతున్న ఈ సినిమా పట్ల అభిమానుల్లో భారీ అంచనాలు నెలకొన్నాయి. సితార ఎంటర్టైన్‌మెంట్స్ భారీ బడ్జెట్‌తో నిర్మిస్తున్న ఈ సినిమా, బాలకృష్ణ కెరీర్‌లో మరో ప్రత్యేక చిత్రంగా నిలవనుందని సినీ వర్గాలు అంచనా వేస్తున్నాయి. ఈ చిత్రంలో శ్రద్ధా శ్రీనాథ్ (Shraddha Srinath) ఊర్వశీ రౌతేలా, చాందినీ చౌదరి(Chandini Chowdary), ప్రగ్యా జైస్వాల్ (Pragya Jaiswal) ముఖ్య పాత్రలలో నటిస్తున్నారు.
ఇప్పటికే విడుదలైన టీజర్‌కు అద్భుతమైన స్పందన వచ్చింది. వాల్తేరు వీరయ్య (Waltair Veerayya) తర్వాత బాబీ దర్శకత్వం వహిస్తున్న ఈ చిత్రం అతని సినిమాటిక్ విజన్‌ను మరింత ఎత్తుకు తీసుకెళ్తుందని ట్రేడ్ అనలిస్టులు భావిస్తున్నారు. త్వరలో ఈ సినిమా ప్రమోషన్లు వేగంగా ప్రారంభం కానున్నాయి. డాకు మహారాజ్ ప్రీరిలీజ్ ఈవెంట్‌ను ప్రత్యేకంగా అమరావతిలో నిర్వహించేందుకు మేకర్స్ పకడ్బందీ ప్రణాళికలు సిద్ధం చేస్తున్నారు.
రాజధాని బ్రాండ్‌ను ఎస్టాబ్లిష్ చేయాలనే క్రమంలో, ఈ కార్యక్రమం అమరావతిలో నిర్వహించడం ద్వారా అదనపు పబ్లిసిటీ సాధించవచ్చని భావిస్తున్నారు. దీంతో పాటు, ప్రముఖ రాజకీయ నేతలను ఈ కార్యక్రమానికి చీఫ్ గెస్టులుగా ఆహ్వానించే అవకాశం ఉందని టాక్ వినిపిస్తోంది. అలాగే, బాలయ్య టీడీపీ ఎమ్మెల్యేగా రాజకీయంగా కూడా కీలకంగా ఉన్నందున, ఒకే వేదికపై బాలయ్య, చంద్రబాబు, పవన్ (Pawan Kalyan) కలిసే అవకాశముంటే, అది ఈ ఈవెంట్‌కు మరింత ప్రాధాన్యతను తీసుకురావచ్చు.
కానీ, ఆ ముగ్గురి సమక్షంలో ఈవెంట్ నిర్వహణ సాధ్యమవుతుందా అనే చర్చ కూడా జరుగుతోంది. ఏది ఏమైనా, ఈ వేడుక సినిమాకు అదనపు బూస్ట్ ఇవ్వడం ఖాయమని అంటున్నారు. ఇదిలా ఉంటే, డాకు మహారాజ్ ప్రీ-రిలీజ్ ప్రమోషన్‌కి సంబంధించి మేకర్స్ ఈ నెలాఖరులో ప్రత్యేక అప్‌డేట్ ఇవ్వనున్నట్లు సమాచారం. బాలయ్య ప్రస్తుతం అఖండ 2 షూటింగ్ ప్రీప్రొడక్షన్ పనుల్లో కూడా బిజీగా ఉన్నారు.
