పూణెకి వెళ్లనున్న భరత్ అనే నేను టీమ్

కొరటాల శివ దర్శకత్వంలో సూపర్ స్టార్ మహేష్ బాబు చేస్తున్న ‘భరత్ అనే నేను’ సినిమా ఫస్ట్ ఓత్ జనవరి 26 న రిలీజ్ అయి విశేషంగా ఆకట్టుకుంది. నేటి ముఖ్యమంత్రిగా మహేష్ ఫస్ట్ లుక్ లో అదరగొట్టారు. ఈ సినిమా షూటింగ్ ప్రస్తుతం రామోజీ ఫిలిం సిటీ లో జరుగుతోంది. అక్కడ క్లైమాక్స్ సీన్ తెరకెక్కిస్తున్నారు. ఈ షెడ్యూల్ ఈనెల 10 న ముగియనుంది. కొన్ని రోజులు రెస్ట్ తీసుకొని చిత్ర యూనిట్ ఈ నెలాఖరులో పూణే కి వెళ్లనుంది. అక్కడ ఓ పాటని చిత్రీకరించనున్నారు. కైరా అద్వానీ, మహేష్ లపై ఈ పాట తెరకెక్కించనున్నారు. తర్వాత మార్చి లో చివరి షెడ్యూల్ మొదలు కానుంది.

16 రోజుల పాటు సాగే ఈ షెడ్యూల్ లో మిలిగిన ఒక పాటతో పాటు, సన్నివేశాలను కంప్లీట్ చేయనున్నారు. దీంతో ప్రొడక్షన్ వర్క్ కంప్లీట్ కానుంది. పోస్ట్ ప్రొడక్షన్ పనుల్లో వేగం పెంచి.. ముందుగా ప్రకటించిన విధంగా ఏప్రిల్ 27న సినిమా రిలీజ్ అయ్యేలా చేయనున్నారు. ప్రముఖ నిర్మాత డి.వి.వి. దానయ్య నిర్మిస్తున్న ఈ సినిమాకి రాక్ స్టార్ దేవీ శ్రీ ప్రసాద్ సంగీతం అందిస్తున్నారు. ఇండస్ట్రీ హిట్ శ్రీమంతుడు కాంబినేషన్లో వస్తున్న ఈ మూవీపై భారీ అంచనాలున్నాయి.