పరిచయ చిత్రంతోపాటు తదుపరి ప్రయత్నంగా నటించిన రెండో సినిమా కూడా ఫ్లాపైనా నటుడిగా తనను తాను ప్రూవ్ చేసుకొన్న అఖిల్ ఇప్పుడు ముచ్చటగా మూడో సినిమాలో నటిస్తున్నాడు. “తొలిప్రేమ” చిత్రంతో దర్శకుడిగా తన స్టామినాను ఘనంగా చాటుకొన్న వెంకీ అట్లూరి దర్శకత్వంలో బి.వి.ఎస్.ఎన్ ప్రసాద్ నిర్మిస్తున్న ఈ చిత్రం షెడ్యూల్ ప్రస్తుతం లండన్ లో నడుస్తోంది. అఖిల్ సరసన నిధి అగర్వాల్ కథానాయికగా నటిస్తున్న ఈ చిత్రంలో ఓ స్పెషల్ సాంగ్ కోసం రకుల్, తమన్నాల పేర్లు పరిశీలిస్తున్నట్లు ఇటీవల వార్తలొచ్చిన విషయం తెలిసిందే.
అయితే.. ఇప్పుడా వెతుకులాటకు ఫుల్ స్టాప్ పడిందని తెలుస్తోంది. వెంకీ-అఖిల్ ల టేస్ట్ కు తగ్గట్లుగా “ఫరా కరిమయీ” అనే బాలీవుడ్ సుందరిని ఎంపిక చేశారని సమాచారం. ఆల్రెడీ బాలయ్య సరసన “శాతకర్ణి” సినిమాలో ఓ చిన్నపాత్ర పోషించిన ఫరాకు టాలీవుడ్ లో ఇది రెండో అవకాశం. హాటెస్ట్ బ్యూటీ అంటూ బాలీవుడ్ జనాలు ముద్దుగా పిలుచుకొనే ఈ సుందరి అఖిల్ బాబుతో కలిసి ఆరబోసే అందాలు, వేసే స్టెప్పులు థియేటర్లో హల్ చల్ చేయడం ఖాయం.
