వర్షం వల్ల ఆగిపోయిన చిరంజీవి సినిమా షూటింగ్!

మెగాస్టార్ చిరంజీవి రీ ఎంట్రీ తర్వాత చేస్తున్న మూవీ సైరా నరసింహా రెడ్డి. తొలి భారతీయ స్వాతంత్ర సమర యోధుడు ఉయ్యాలవాడ నరసింహ రెడ్డి జీవితం ఆధారంగా రూపుదిద్దుకుంటున్న ఈ మూవీలో బిగ్ బీ అమితాబ్ బచ్చన్ కీలకరోల్ పోషిస్తున్నారు. డైరక్టర్ సురేందర్ రెడ్డి దర్శకత్వంలో తెరకెక్కుతున్న ఈ చిత్రం స్టడీగా షూటింగ్ జరుపుకుంటోంది. తొలి షెడ్యూల్ ని హైదరాబాద్ లోని నానక్ రామ్ గూడా స్టూడియోస్ లో వేసిన భారీ సెట్ లో పూర్తి చేయగా.. రెండో షెడ్యూల్ ని అల్యూమినియం ఫ్యాక్టరీలో వేసిన కోయిలకుంట్ల ట్రెజరీ సెట్ లో కంప్లీట్ చేశారు. ప్రస్తుతం కోకాపేట్‌ లో వేసిన స్పెషల్ సెట్‌లో ఈ చిత్రం షూటింగ్ జరుగుతోంది.

రాత్రి పగలు అని తేడా లేకుండా చిత్రబృందం కష్టపడుతోంది. ఈ షూటింగ్ నాలుగురోజులుగా జరగడం లేదు. అందుకు కారణం వర్షం. వారం రోజులుగా కురుస్తున్న వర్షం చిత్ర బృందానికి తీవ్ర ఆటంకాన్ని కలిగిస్తోంది. ఎప్పుడు వర్షం సెలవు ఇస్తుందా ? షూటింగ్ చేద్దామని అనుకున్న చిత్ర బృందానికి ఈ వారం నిరాశే మిగిలింది. అయినా సురేందర్ రెడ్డి కంగారు పడడం లేదని తెలిసింది. ఎన్ని రోజులు వృధా అయినప్పటికీ చిత్రీకరణలో కాంప్రమైజ్ వద్దని నిర్మాత రామ్ చరణ్ తేజ్ గట్టిగా చెప్పినట్టు తెలిసింది. అందుకే రిలీజ్ డేట్ ని కూడా ఫిక్స్ చేయలేదని సమాచారం. నయనతార ప్రధాన హీరోయిన్ గా నటిస్తున్న ఈ సినిమా కోసం మెగా అభిమానులు ఆత్రంగా ఎదురుచూస్తున్నారు.