ఫోక్ సింగర్ గా కెరీర్ ప్రారంభించిన మంగ్లీ.. (Mangli) నిత్యం ఏదో ఒక వివాదంతో వార్తల్లో నిలుస్తూ ఉంటుంది. ఆమె పాడిన డివోషనల్ సాంగ్స్ విషయంలో గతంలో హిందూ సంఘాలు మీడియా ముందుకొచ్చి రచ్చ చేసిన సందర్భాలు ఉన్నాయి. ఆ తర్వాత సినిమాల్లో బిజీ అయినప్పటికీ… ఆమె పాడిన పాటల గురించి ఏదో ఒక వివాదం రేగుతూనే ఉంది.
ఇదిలా ఉంటే.. నిన్న తన బర్త్ డే పార్టీ ఎరేంజ్ చేసుకుంది మంగ్లీ. చేవెళ్లలోని ఈర్లపల్లి గ్రామ శివార్లలో ఉన్న త్రిపుర రెస్టారెంట్ అండ్ బాంకెట్ హాల్లో ఆమె బర్త్ డే సెలబ్రేషన్స్ ను ప్లాన్ చేసుకుంది. అయితే ఇది సాదా సీదా పార్టీ అని అంతా అనుకున్నారు.కానీ ఈ పార్టీలో విదేశీ మద్యం, డ్రగ్స్, గంజాయి వంటివి ప్రత్యక్షమవడం అందరికీ షాకిచ్చింది. చేవెళ్ల పోలీసులకు సమాచారం వెళ్లడంతో.. త్రిపుర రెస్టారెంట్ పై ఆకస్మిక దాడులు నిర్వహించారు.. దీంతో అసలు విషయం బయటపడింది.
వెంటనే మద్యాన్ని సీజ్ చేశారట. ఈ పార్టీలో పాల్గొన్న 48 మందికి వైద్య పరీక్షలు నిర్వహించగా 9 మందికి పాజిటివ్ వచ్చినట్లు తెలుస్తుంది. దీంతో NDPS యాక్ట్ కింద ఆ 9 మందిపై కేసు నమోదు చేసినట్లు సమాచారం. అనుమతి లేకుండా పార్టీ నిర్వహించిన కారణంగా మంగ్లీ పై కూడా కేసు నమోదు చేశారట.
సాధారణంగా ఇలాంటి రైడ్స్ జరిగినప్పుడు గుట్టుచప్పుడు కాకుండా ఇష్యూని అక్కడికక్కడే క్లోజ్ చేస్తుంటారు. కానీ మంగ్లీ విషయంలో ఆ ఛాన్స్ కూడా లేకుండా చేయడంపై అనుమానాలు వ్యక్తమవుతున్నాయి. ఆమె అంటే పడని వాళ్ళు.. టార్గెట్ చేసి ఆమెను ఇరికించినట్టు కొంతమంది అభిప్రాయపడుతున్నారు. మరి నిజానిజాలు ఏంటో తేలాలి.
Home
