టాలీవుడ్ హీరో నవదీప్ (Navdeep) ప్రధాన పాత్రలో తెరకెక్కిన చిత్రం ‘లవ్ మౌళి’. అవ‌నీంద్ర దర్శకత్వంలో తెరకెక్కిన ఈ చిత్రాన్ని ‘నైరా క్రియేషన్స్’ మరియు ‘శ్రీకర స్టూడియోస్’ బ్యానర్లపై సి స్పేస్ వారు నిర్మిస్తున్నారు. పంఖురి గిద్వానీ, భావన సాగి హీరోయిన్లుగా నటిస్తున్నారు. ఈ సినిమాలో నవదీప్ లుక్ చాలా చిత్ర విచిత్రంగా ఉంది. అందుకు తగ్గట్టే ఈ సినిమా టీజర్, ట్రైలర్స్ కూడా ఉన్నాయి అని చెప్పాలి. ఈ సినిమా ఓ కొత్త నవదీప్ ని ప్రేక్షకులకు పరిచయం చేస్తుందని మేకర్స్ ధీమా వ్యక్తం చేస్తున్నారు.
నవదీప్ కూడా ఇప్పటివరకు తనకు లేని థియేట్రికల్ మార్కెట్ ను ఏర్పరుస్తుందనే కాన్ఫిడెన్స్ ను వ్యక్తం చేస్తున్నాడు. నవదీప్ నటించిన ‘ఈగల్’ (Eagle) ‘ఆపరేషన్ వాలెంటైన్’ (Operation Valentine) వంటి సినిమాల ప్రమోషన్స్ లో కూడా ‘లవ్ మౌళి’ ని ప్రమోట్ చేసుకున్నాడు నవదీప్. ఇదిలా ఉండగా.. ‘లవ్ మౌళి’ చిత్రం వాస్తవానికి ఏప్రిల్ 19న రిలీజ్ కావాల్సి ఉంది. కానీ ఈ సినిమా ఆ టైంకి రిలీజ్ కావడం లేదు అనే టాక్ ఇప్పుడు ఎక్కువగా వినిపిస్తుంది.
ఎందుకంటే.. ‘లవ్ మౌళి’ చిత్రానికి సెన్సార్ పనులు పూర్తవ్వలేదట. ఇందులో చాలా సన్నివేశాలు వల్గర్ గా ఉన్నాయనే ఉద్దేశంతో సెన్సార్ వాళ్ళు అభ్యంతరాలు తెలిపినట్టు సమాచారం. అన్నీ అనుకున్నట్లు జరిగితే ‘లవ్ మౌళి’ సినిమా ఏప్రిల్ 26న రిలీజ్ అవుతుంది. ఇక ఇటీవల రిలీజ్ అయిన ‘లవ్ మౌళి’ ట్రైలర్ లో విజువల్స్ తప్ప ఆకట్టుకునే అంశాలు ఏమీ లేవు. పైగా బోల్డ్ సీన్స్ కూడా ఎక్కువగా ఉన్నాయి. అందుకే సెన్సార్ ఇబ్బందులు ఎదురయ్యాయని స్పష్టమవుతుంది.
