టాలీవుడ్, బాలీవుడ్, కోలీవుడ్, మాలీవుడ్ లో ప్రస్తుతం బయోపిక్ ల హవా నడుస్తోంది. వారు వీరు అని తేడా లేకుండా కాస్త మంచి ఇమేజ్ లేదా కాంట్రవర్సీ ఉన్న నటీనటులు, రాజకీయ నాయకులు, క్రికెటర్స్ & పాపులర్ అయిన సాధారణ వ్యక్తుల జీవితాల ఆధారంగా సినిమాలు తెరకెక్కించే పనిలో బిజీ అయిపోయారు మన మేకర్స్. సందులో సడేమియా అన్నట్లుగా సడన్ గా చంద్రబాబు బయోపిక్ అంటూ “చంద్రోదయం” అనే చిత్రాన్ని ఎనౌన్స్ చేశారు. దాంతో “ఎన్.టి.ఆర్” బయోపిక్ రేంజ్ లో బాబు బయోపిక్ కూడా వస్తుందేమోనని తెగ సంబరపడిపోయారు చంద్రబాబు అభిమానులు మరియు టి.డి.పి కార్యకర్తలు. అయితే.. వారి అంచనాలను తలకిందులు చేస్తూ “చంద్రోదయం” ఫస్ట్ లుక్ విడుదలైంది. సదరు ఫస్ట్ లుక్స్ & పోస్టర్ చూసినవాళ్ళందరూ “ఇది బయోపిక్ ఫిలిమా లేక స్పూఫ్ తీస్తున్నారా?” అని సందేహపడ్డారు.
ఆ అంచనాలను ఏమాత్రం పాడుచెయ్యకుండా మొన్నామధ్య విడుదలైన మరో ఫోటోలో చంద్రబాబు-ఎన్టీఆర్ అంటూ ఎవరో డూప్స్ తో సినిమా షూటింగ్ చేయడంతో తెలుగుదేశం తమ్ముళ్ళు తీవ్ర ఆగ్రహం వ్యక్తం చేశారు. ఒక ముఖ్యమంత్రి మీద తీసే సినిమా ఆయన ఇమేజ్ కు గౌరవాన్నిచ్చేలా ఉండాలి కానీ.. నవ్వులపాలు చేసేలా ఉండకూడదు అని భావించిన టి.డి.పి వర్గాలు ఉన్నపళంగా ఆ సినిమా షూటింగ్ ఆపేయాలని సదరు దర్శకనిర్మాతలు ఆర్డర్లు జారీ చేశారట. తమ సినిమాని ఆదరిస్తారనుకొన్నవాళ్లే ఆపేయమని చెప్పడంతో వేరే దారి లేక ఆ సినిమాను ఉన్నపళంగా ఆపేశారట. దాంతో చంద్రబాబు నాయుడు అభిమానులందరూ ఊపిరి పీల్చుకున్నారు.
