Ravi Teja: రవితేజలో ఈ రెండు మార్పులు గమనించారా..!

April 7, 2022 / 06:13 PM ISTByFilmy Focus

Join Us

Ravi Teja: రవితేజలో ఈ రెండు మార్పులు గమనించారా..!

వరుసగా సినిమాలు చేయడం, మంచి పేరు తెచ్చుకోవడం, ఏమవుతుందో ఏమో తెలియదు ఒక్కసారిగా ఫ్లాప్‌ల్లో పడిపోతాడు. తర్వాత ఫీనిక్స్‌ పక్షిలాగా తనను తాను సెట్‌ రైట్‌ చేసుకొని మళ్లీ వచ్చి విజయాలు అందుకుంటూ ఉంటాడు. ఇదంతా ఎవరికోసమో కాదు మన మాస్‌ మహారాజ్‌ రవితేజ కోసం. అదంతా ఓకే ఇప్పుడు ఎందుకు చెబుతున్నాం అనుకుంటున్నారా? ఆ టాలీవుడ్‌ ఫీనిక్స్‌ పక్షి స్టైల్‌లో కొంతమార్పు కనిపిస్తోంది. ఇప్పుడవి టాక్‌ ఆఫ్‌ ది టౌన్‌గా మారాయి.

రవితేజ రీసెంట్‌ యాక్టివిటీస్‌ చూస్తే ఈ విషయం సులభంగా అర్థమైపోతుంది. రీసెంట్‌ టైమ్స్‌లో వరుసగా సోలో హీరోగా సినిమాలు చేస్తూ వస్తున్న రవితేజ.. చిరంజీవి సినిమాలో కీలక పాత్ర చేయడానికి అంగీకరించాడు. దాంతోపాటు బాలకృష్ణ సినిమాలో కూడా కీలక పాత్ర చేస్తారని వార్తలు వస్తున్నాయి. అవునా నిజమా అనుకునేలోపు విష్ణు విశాల్‌ సినిమాలో రవితేజ నటిస్తున్నాడని అంటున్నారు. ఇందులో నిజానిజాలు తెలియవు కానీ. ఇదే జరిగితే రవితేజ స్టయిల్‌ మార్చినట్లే. కేవలం హీరో అనేకాకుండా మంచి పాత్ర వస్తే చేయడానికి రెడీ అయినట్లే.

ఇక రవితేజలో కనిపిస్తున్న రెండో మార్పు. సినిమా నిర్మాణం. విష్ణువిశాల్‌తో ఇటీవల ‘మట్టి కుస్తీ’ అనే సినిమాను నిర్మాతగా అనౌన్స్‌ చేశాడు రవితేజ. అయితే ఇది నిర్మాతగా అతని మొదటి సినిమా అనొచ్చు. ఇప్పటివరకు అన్నీ సహనిర్మాతగానే సినిమాలు చేశాడు/ చేస్తున్నాడు రవితేజ. ఇప్పటికే సెట్స్‌ మీదున్న ‘రామారావు ఆన్‌ డ్యూటీ’, ‘రావణాసుర’ లాంటి సినిమాల్లో రవితేజ నిర్మాణ భాగస్వామి అనే విషయం తెలిసిందే. అంతకుముందు విష్ణు విశాల్‌ ‘ఎఫ్‌ఐఆర్‌’కి సమర్పకుడు కూడా.

ఇదంతా చూస్తుంటే మీకు కూడా అనిపిస్తోంది కదా రవితేజలో మార్పు వచ్చింది. తన సినిమాలు, తన కథలు అనుకునే రవితేజ… కొన్నిదారుణమైన పరాజయాలు కూడా చవిచూశాడు. ఎంపికలో లోపం, నిర్మాతల విషయంలో ఇబ్బందులు ఎదుర్కొన్నాడు. ఇప్పుడు తనే నిర్మాణ భాగస్వామి కావడంతోపాటు, ఇతర హీరోల సినిమాలూ నిర్మిస్తున్నాడు. ఇంకోవైపు ఇండస్ట్రీకి వచ్చిన తొలి రోజుల్లో ఇతర హీరోలతో నటించిన రవితేజ… ఇప్పుడు పెద్ద హీరో అయ్యాక తొలిసారి వేరే హీరోలతో నటించడానికి ఓకే చెప్పాడు.