మెగాస్టార్ చిరంజీవి 150 వ సినిమా పేర్లు అంటూ కొన్ని టైటిల్స్ చక్కర్లు కొడుతున్నాయి. మెగా పవర్ స్టార్ రామ్ చరణ్ తేజ్ కొణిదెల ప్రొడక్షన్ కంపెనీ పై నిర్మిస్తున్న ఈ సినిమాకు వర్కింగ్ టైటిల్ గా “కత్తిలాంటోడు” కొంతకాలం కొనసాగింది. చెర్రీ పేరు మారుస్తామని ప్రకటించినప్పటి నుంచి కొత్త పేర్లు వెలుగులోకి వచ్చాయి.
వి.వి.వినాయక్ దర్శకత్వంలో వస్తున్న ఈ చిత్రంలో చిరు రైతుల కోసం పోరాడే యువకుడిగా కనిపించనున్నారు. వారి కోసం జైలుకు కూడా వెళుతారు. ఖైదీ 150 గా బందీ అవుతాడు. సో ఖైదీ 150 నే సినిమా పేరు అయి ఉంటుందని అభిమానులను అనుకున్నారు. చిత్ర బృందం నుంచి ఈ టైటిల్ పై ఏ అభిప్రాయం వెలువడలేదు. తాజాగా చిరు ప్రతిష్టాత్మక చిత్రానికి నెపోలియన్ పేరును ఖరారు చేసినట్లు ఫిలిం నగర్ సమాచారం.
గతంలో ఠాగూర్, స్టాలిన్ పేర్లు మెగాస్టార్ కి విజయాన్ని అందించాయని, నెపోలియన్ కూడా చిరుకు సూటవుతుందని అందుకే ఈ పేరుని చిత్ర బృందం పరిశీలిస్తున్నట్లు తెలిసింది. చిరంజీవికి ఈ టైటిల్ నచ్చితే ఆయనే స్వయంగా ప్రకటించనున్నారు. మెగా అభిమానులు ఎంతగానో ఎదురు చూస్తున్న చిరు సినిమా టైటిల్ ఏంటో కొన్ని రోజుల్లో పక్కాగా తెలిసిపోనుంది.
