సినిమాకు సీక్వెల్‌ అంటే చిన్న విషయం కాదు. కథ ఓకే అవ్వడం, నటీనటులు.. అన్నీ అయ్యాక ఫలితం ఇలా ఏదీ అంత ఈజీ కాదు. అయితే ఇదంతా టాలీవుడ్‌ వరకే. ఇటీవల వచ్చిన ఓ సినిమా ఇలానే ఇబ్బందిపడి.. జనాల్ని ఇబ్బంది పెట్టింది. అయితే ఇతర భాషల పరిశ్రమల్లో సీక్వెల్స్‌ హిట్ కాన్సెప్ట్‌లే. అందుకేనేమో విక్రమ్‌ కూడా తన కొత్త సినిమాకు సీక్వెల్‌ వస్తుంది అని ప్రకటించేశాడు. స్వాతంత్ర్య దినోత్సవం సందర్భంగా విక్రమ్‌ (Chiyaan Vikram) నటించిన ‘తంగలాన్‌’ (Thangalaan) సినిమా వచ్చి మంచి టాకే తెచ్చుకుంది. ఈ సినిమా సక్సెస్‌ మీట్‌లో భాగంగా విక్రమ్‌ మాట్లాడుతూ..
సినిమా విజయం పట్ల ఆనందం వ్యక్తం చేశాడు. అలాగే సీక్వెల్‌గా ‘తంగలాన్‌ 2’ వస్తుందని కూడా ప్రకటించాడు. సినిమా ఫలితంతో తాను అమితానందంలో ఉన్నానని విక్రమ్‌ చెప్పాడు కూడా. దీనికి రెండు కారణాలు ఉన్నాయని కూడా చెప్పాడు. తన తాజా చిత్రం ‘తంగలాన్‌’ మంచి టాక్‌ సొంతం చేసుకోవడం ఒక కారణమైతే.. తాను గతంలో నటించిన ‘పొన్నియిన్‌ సెల్వన్‌ 1’ సినిమాకు నాలుగు విభాగాల్లో జాతీయ పురస్కారాలు రావడం మరో కారణం అని చెప్పాడు.
ఈ డబుల్‌ ఆనందంలో ‘తంగలాన్‌’ సీక్వెల్‌ను ప్రకటిస్తున్నా అని చెప్పాడు. సినిమా పార్ట్‌ 2 గురించి దర్శక, నిర్మాతలతో ఇప్పటికే చర్చించానని కూడా చెప్పాడు. సినిమాకు సంబంధించిన అన్ని పనులు పూర్తి చేసుకుని వీలైనంత త్వరలో షూటింగ్‌ ప్రారంభిస్తామని విక్రమ్‌ చెప్పాడు. ‘తంగలాన్‌’ మట్టి కథ. తెలుగు ప్రేక్షకులు తప్పక ఆదరిస్తారనే నమ్మకం ఉండేది. ఇప్పుడు అదే జరిగింది. ఇదంతా దర్శకుడు రంజిత్‌ (Pa. Ranjith) వల్లే సాధ్యమైంది అని ఆనందం వ్యక్తం చేశాడు.
ఇక ‘పేట’ (Petta) , ‘మాస్టర్‌’ (Master) తర్వాత ఇక్కడ థియేటర్లలో విడుదలైన మూడో సినిమా ఇది అని మాళవిక (Malavika Mohanan) చెప్పింది. తాను చేసిన మూడు సినిమాలూ విజయం సాధించినందుకు ఆనందంగా ఉందని కూడా చెప్పింది. దీంతో ఇప్పుడు స్ట్రయిట్‌ తెలుగు సినిమా వంతు అని, త్వరలో ‘ది రాజాసాబ్‌’ (The Rajasaab) తో వస్తా అని చెప్పింది. ఆ సినిమా హీరో ప్రభాస్‌ (Prabhas) కాబట్టి నేను సేఫ్‌ అంటూ సక్సెస్‌ని ఉద్దేశించి చెప్పింది మాళవిక.
Home