శర్వానంద్‌ (Sharwanand) సినిమా ‘రాధ’ (Radha) గుర్తుందా? అందులో మినిస్టర్‌ సుజాత అనే విలన్‌ పాత్రలో నటించారు రవి కిషన్ (Ravi Kishan). సినిమా ఆఖరులో ‘నేను నీ కొడుకును నాన్నా..’ అంటూ ‘నాన్నకు ప్రేమతో’ థీమ్‌తో వస్తాడు సప్తగిరి (Saptagiri). ఆ ఇష్యూతో మొత్తం పొలిటికల్ కెరీర్‌ను ఇరుకున పెట్టేసుకుంటాడు మినిస్టర్‌ సుజాత. ఇప్పుడు ఈ చర్చ ఎందుకు అనుకుంటున్నారా? ఆయన నిజ జీవితంలో ఇప్పుడు ఇలాంటి పరిస్థితే వచ్చింది. దీనికి సంబంధించిన వీడియోలు ఇప్పుడు వైరల్‌గా మారాయి.
ఆ సినిమాలో ఆయన రాజకీయ నాయకుడిగా నటించినా… ఆయన నిజ జీవితంలోనూ పొలిటికల్ లీడరే. ఈ క్రమంలోనే తాను రవి కిషన్ కూతురిని అంటూ ఓ వీడియోను రిలీజ్‌ చేసింది ఓ అమ్మాయి. తన తల్లి అంటూ ఓ మహిళను ముందుకు తీసుకొచ్చింది. అంతేకాదు ఈ విషయాన్ని నిరూపించడానికి ఎంత దూరం అయినా వెళ్తానంటూ యుద్ధానికి దిగింది. సీనియర్ ఆర్టిస్ట్‌గా, పొలిటిషియన్‌గా గుర్తింపు తెచ్చుకున్న రవి కిషన్‌పై ఇలాంటి ఆరోపణలు రావడంతో ప్రేక్షకులు షాకవుతున్నారు.
షినోవా అనే ఒక అమ్మాయి తాను రవి కిషన్ కూతురిని అంటూ వీడియో విడుదల చేసింది. తాను రవి కిషన్ కూతురినే అని నిరూపించుకోవడానికి ఆధారాలతో ముందుకు వస్తానని, దానికి కొంత సమయం కావాలని ఉత్తర ప్రదేశ్ సీఎం యోగి ఆదిత్యనాథ్‌ను కోరింది. ఆ వీడియో సోషల్ మీడియాలో వైరల్ అవ్వడంతో అంతా అసలు నిజం ఏంటో తెలుసుకోవడానికి మీడియా షినోవాను కలిసింది. ఆ సమయంలోనే షినోవా తల్లిని అంటూ అపర్ణ అనే మహిళ మీడియాతో మాట్లాడింది.
1996లో రవి కిషన్‌కు, తనకు స్నేహితుల సమక్షంలో పెళ్లి జరిగిందని అపర్ణ చెబుతున్నారు. కొంతమంది నటుల విషయంలో ఇలాంటి సంఘటనలు గతంలో జరిగాయి. ఇది కూడా అలాంటిదే అని కొందరు అంటున్నా… నిజం ఉందో లేదో తేల్చాల్సిందే అని మరికొందరు అంటున్నారు. అయితే ఇదంతా ఆయన నటించిన సినిమా ‘రాధ’లో సన్నివేశాలనే పోలి ఉన్నాయని మరికొందరు గుర్తు చేస్తున్నారు. మరి ఈ విషయంలో ఏం జరుగుతుందో చూడాలి.
