ప్రభాస్ వల్ల చాలా టైమ్ సేవ్ అయ్యిందని సంబరపడుతున్న సుజీత్

ఒక్కోసారి దర్శకుడు సన్నివేశాన్ని ఎంత అద్భుతంగా తీద్దామని ప్లాన్ చేసినా.. హీరోహీరోయిన్లు సహకరించకపోవడంతో ఆ సన్నివేశాలు కేవలం పేపర్లకే పరిమితమైపోతాయి. అదే ఒక హీరో కనుక దర్శకుడిని, అతడి ఆలోచనని గౌరవించి అతడు చెప్పిన, అడిగినదానికంటే బెటర్ అవుట్ పుట్ ఇచ్చాడు అనుకో ఆ దర్శకుడి ఆనందానికి అవధులుండవు. ప్రస్తుతం “సాహో” డైరెక్టర్ సుజీత్ ఆ ఆనందపరవశంలోనే మునుగితేలుతున్నాడు.

ఇంతకీ ఆ ఆనందానికి కారణం ఎంటా అనుకొంటున్నారా… రీసెంట్ గా “సాహో” షెడ్యూల్ దుబాయ్ లో జరిగిన విషయం తెలిసిందే. ఈ షెడ్యూల్ లో ప్రభాస్ పై భారీ యాక్షన్ సీక్వెన్స్ లు షూట్ చేశారు. హాలీవుడ్ చిత్రం “మిషన్ ఇంపాజబుల్”, బాలీవుడ్ చిత్రం “రేస్ 3” తర్వాత దుబాయ్ లో యాక్షన్ సీక్వెన్స్ లు షూట్ చేసిన మొట్టమొదటి తెలుగు చిత్రం “సాహో”. ఈ యాక్షన్ సీక్వెన్స్ లలో ప్రభాస్ డూప్ లేకుండా రిస్క్ తో చేయడం వలన సీజీ వర్క్ చేయాల్సిన అవసరం లేకుండాపోయిందట. దాంతో పోస్ట్ ప్రొడక్షన్ వర్క్ అనుకొన్నదానికంటే త్వరగా అయిపోయిందట. దాంతో తెగ సంబరపడిపోతున్నాడు సుజీత్ బాబు.