టాలీవుడ్లో ఆసక్తికరంగా మారిన ఒక ప్రాజెక్ట్ గురించి తాజాగా ఫిల్మ్ నగర్లో గుసగుసలు వినిపిస్తున్నాయి. యువ దర్శకుడు వశిష్ఠ, మొదటగా బాలయ్య తనయుడు మోక్షజ్ఞ వెండితెర ఎంట్రీ కోసం ఓ ప్రత్యేక కథను సిద్ధం చేసినట్లు సమాచారం. నందమూరి అభిమానుల్లో భారీ అంచనాలు రేకెత్తించేలా ఈ ప్రాజెక్ట్ ఉండబోతుందని ప్రచారం కూడా జరిగింది.
అయితే కథ చెప్పే ప్రక్రియలో ఒక ఆసక్తికర ట్విస్ట్ చోటు చేసుకుంది. అదే సమయంలో నందమూరి బాలకృష్ణకు కూడా వశిష్ఠ మరో కథ వినిపించాడట. ఆ కథ బాలయ్యకు నచ్చడంతో, మోక్షజ్ఞ కోసం సిద్ధం చేసిన ప్రాజెక్ట్ను పక్కన పెట్టి, బాలకృష్ణతో సినిమా ప్రారంభించే ఆలోచనలో ఉన్నట్లు తెలుస్తోంది. దీంతో ఈ ప్రాజెక్ట్ దిశ పూర్తిగా మారిపోయిందని ఇండస్ట్రీ వర్గాలు చెబుతున్నాయి.
ఇలాంటి పరిణామం ఇదే మొదటిసారి కాదని సినీ విశ్లేషకులు గుర్తుచేస్తున్నారు. గతంలో కూడా వశిష్ఠ గ్లోబల్ స్టార్ రామ్ చరణ్ కోసం కథను సిద్ధం చేసిన సమయంలో, ఆ ప్రాసెస్లో మెగాస్టార్ చిరంజీవికి కథ చెప్పడం, చివరికి ‘విశ్వంభర’ ప్రాజెక్ట్ పట్టాలెక్కటం అందరికి తెల్సిన విషయమే. అదే తరహాలో ఇప్పుడు కూడా కథ మార్పులు, హీరో మార్పులు చోటు చేసుకుంటున్నాయి.
ప్రస్తుతం ఈ కొత్త కాంబినేషన్పై అధికారిక ప్రకటన రానప్పటికీ, బాలకృష్ణ – వశిష్ఠ కాంబోపై అభిమానుల్లో ఆసక్తి పెరుగుతోంది. మరోవైపు, మోక్షజ్ఞ ఎంట్రీ కోసం ఎదురుచూస్తున్న ఫ్యాన్స్ మాత్రం తమ హీరో ప్రాజెక్ట్ ఎప్పుడు ప్రారంభమవుతుందా అని ఆసక్తిగా చూస్తున్నారు. ఈ పరిణామాలు చూస్తుంటే, టాలీవుడ్లో కథల ప్రయాణం ఎంత వేగంగా మలుపులు తిరుగుతాయో మరోసారి స్పష్టమవుతోంది.
