నారా రోహిత్ జోడీగా నటించనున్న ఈషా రెబ్బా!

గురు సినిమా తర్వాత వెంకటేష్ తేజ దర్శకత్వంలో నటించడానికి గ్రీన్ సిగ్నల్ ఇచ్చారు. ఈ సినిమా ప్రీ ప్రొడక్షన్ పనులు ఓ కొలిక్కి వచ్చాయి. ఈనెల 12 నుంచి రెగ్యులర్ షూటింగ్ మొదలుకానుంది. “ఆట నాదే.. వేట నాదే” అనే టైటిల్ పరిశీలిస్తున్న ఈ సినిమాని సురేశ్ ప్రొడక్షన్స్, ఎ.కె. ఎంటర్‎టైన్ మెంట్స్ సంయుక్తంగా నిర్మించనున్నారు. ఇందులో నారా రోహిత్ వెంకటేష్ కి బావమరిదిగా నటించనున్నారు. వెంకీ జోడీగా   శ్రియని ఫిక్స్ చేసినట్లు తెలిసింది. “సుభాశ్ చంద్రబోస్”,  “గోపాల గోపాల” సినిమాల్లో శ్రియ, వెంకటేష్ కలిసి నటించారు.

ఇప్పుడు మూడో సారి వెండితెరపై కనువిందు చేయనున్నారు. ఇక ఇందులో వెంకటేష్ చెల్లెలుగా.. అంటే నారారోహిత్ మరదలిగా తెలుగు నటి ఈషా రెబ్బా నటించనున్నట్లు తెలిసింది. ఈ సినిమాలో నారా రోహిత్ అక్క శ్రియను వెంకటేష్ పెళ్లి చేసుకుంటే… వెంకీ చెల్లెలు ఈషా రెబ్బాను రోహిత్ పెళ్లి చేసుకుంటారని తెలిసింది. చూస్తుంటే ఇది మంచి కుటుంబ కథ చిత్రమని అనిపిస్తోంది. అమితుమీ, అ చిత్రాల్లో చక్కగా నటించి మంచి మార్కులు కొట్టేసిన ఈషా రెబ్బా తేజ చిత్రంలోను  తనదైన నటనతో ఆకట్టుకోనుంది.