Epic Review in Telugu: ‘ఎపిక్’ సినిమా రివ్యూ & రేటింగ్!

నటీనటుల పనితీరు: ‘బేబీ’తో సూపర్ హిట్ పెయిర్ అనిపించుకున్న ఆనంద్ దేవరకొండ, వైష్ణవి ఈ సినిమాకు ప్రధాన బలం. ఆదిత్య అనే అమాయకపు కుర్రాడిగా ఆనంద్ చాలా నేచురల్‌గా పెర్ఫార్మ్ చేశాడు. అతని బాడీ లాంగ్వేజ్ కూడా ఇందులో బాగుంది. మునుపటి సినిమాలతో పోలిస్తే, ఆనంద్ నటుడిగా ఇంప్రూవ్ అయ్యాడు. అయితే ఆనంద్ కంటే వైష్ణవి కొంచెం ఎక్కువ మార్కులు కొట్టేసిందని చెప్పాలి. ఇలాంటి పాత్రను ఆమె ఈ టైమ్‌లో ఓకే చేయడం కూడా ఒక ఛాలెంజ్ అనే చెప్పాలి. ఎందుకంటే ‘బేబీ’తో వైష్ణవిపై కొన్ని విమర్శలు వచ్చాయి. వాటిని అధిగమించే క్రమంలో ‘లవ్ మీ’, ‘జాక్’ వంటి కంటెంట్ లేని సినిమాలు చేసి తన ఇమేజ్‌ను కొంతవరకు డ్యామేజ్ చేసుకుంది. అయితే కడలి పాత్రలో ఆమె ఒదిగిపోయింది. ఆమె మేకోవర్ కావచ్చు, లవ్ మేకింగ్ సీన్స్‌లో కావచ్చు, ఎమోషనల్ సీన్స్‌లో కావచ్చు.. వైష్ణవి తన బెస్ట్ ఇచ్చేసింది. కాకపోతే క్లైమాక్స్‌లో ఈమె పాత్రకు ఇచ్చిన ఎండింగ్ ఎందుకో అంత కన్విన్సింగ్‌గా అనిపించదు.ఇకపోతే తండ్రి పాత్రలో శివాజీ కూడా చాలా ఈజ్‌తో పెర్ఫార్మ్ చేశాడు. వాసుకి కూడా బాగా చేసింది. వీళ్ల సీన్స్ ఇంకొన్ని ఉంటే బాగుండు అనేలా ఉన్నాయి. కళ్యాణ్ శంకర్ రోల్ కూడా కథలో కీలకం అయ్యింది. అతను పలికే డైలాగులు కొన్ని యూత్‌ను అమితంగా ఆకట్టుకుంటాయి. శ్రీనివాస్ గవిరెడ్డి కూడా బాగానే చేశాడు. మిగతా నటీనటులు ఓకే.

సాంకేతిక నిపుణుల పనితీరు: ప్రీ రిలీజ్ ఈవెంట్‌లో హీరో ఆనంద్ దేవరకొండ చెప్పినట్టు.. నిజంగానే ఇది ఒక మామూలు కథ. కానీ చాలా బలంగా చెప్పిన కథ. కమర్షియల్ ట్విస్టులు ఉండవు, ఇంటర్వెల్ బ్యాంగ్ ఉండదు, క్లైమాక్స్‌లో రక్తపాతం ఉండదు. అయినప్పటికీ సినిమాలో చాలా చోట్ల కొన్ని సన్నివేశాలు బాగా పేల్తాయి. ఉదాహరణకు ఫస్ట్ హాఫ్ చూసుకుంటే.. కేవలం 2, 3 సన్నివేశాలే ఉంటాయి. హీరో అమెరికా రావడం.. హీరోయిన్‌ను కలవడం.. ఆమెతో లివింగ్ రిలేషన్‌షిప్ మొదలుపెట్టడం, ఆమెతో ఫిజికల్‌గా ఒకటవ్వడం.. ఇంతే! కానీ ఆ సన్నివేశాలను కూడా దర్శకుడు ఆదిత్య చాలా బాగా హ్యాండిల్ చేశాడు. ముఖ్యంగా రైటింగ్‌తో మ్యాజిక్ చేశాడు. హీరో కన్ఫ్యూజన్, హీరోయిన్ ఇన్‌సెక్యూరిటీస్‌ను వివరిస్తూ వచ్చే కొన్ని సంభాషణలు బాగుంటాయి.

సెకండాఫ్‌ను క్లైమాక్స్ వరకు ఇంకా సెన్సిబుల్‌గా హ్యాండిల్ చేశాడనిపిస్తుంది. ముఖ్యంగా హీరోయిన్ నెలసరి టైంలో పడే ఇబ్బందులను, దానిని హీరో అర్థం చేసుకుని నడుచుకునే తీరును చాలా మెచ్యూర్డ్‌గా డీల్ చేశాడు ఆదిత్య. ఆ తర్వాత హీరోయిన్ తన స్నేహితురాలితో ఒక డైలాగ్ చెబుతుంది.. ‘వీడికి పుట్టే కూతురు చాలా అదృష్టవంతురాలు’ అని! అది సింపుల్ డైలాగే కానీ, అందులో కూడా చాలా డెప్త్ కనిపిస్తుంది. అలాగే హీరోకు, తండ్రికి మధ్య వచ్చే ఫోన్ కాల్ సన్నివేశం కూడా అందరూ ఎమోషనల్‌గా కనెక్ట్ అయ్యేలా చేస్తుంది. అయితే క్లైమాక్స్‌ను సడన్‌గా ముగించిన తీరు మాత్రం కొంత డిజప్పాయింట్ చేస్తుంది. అలాగే సినిమాలో దర్శకుడు చాలా సినిమాటిక్ లిబర్టీస్ తీసుకున్నాడు. వాటికి కన్విన్స్ అయ్యేవాళ్లు తక్కువ మందే ఉండొచ్చు. అవి పక్కన పెట్టేస్తే.. నిర్మాణ విలువలు బాగున్నాయి. కథకు ఎక్కడా లోటు చేయలేదు. సంగీతం కూడా సినిమాకు మేజర్ ప్లస్ పాయింట్. పాటలన్నీ బాగున్నాయి. బ్యాక్‌గ్రౌండ్ స్కోర్ కూడా సినిమా మూడ్‌కు తగ్గట్టు చాలా బాగా కుదిరింది. సినిమాటోగ్రఫీ కూడా సినిమాకు రిచ్‌నెస్ తీసుకొచ్చింది.

విశ్లేషణ: ‘ఎపిక్’.. పూర్తిగా యూత్‌ను దృష్టిలో పెట్టుకుని తీసిన సినిమా. కెరీర్ పట్ల వాళ్లకు ఉండే కన్ఫ్యూజన్స్, ఫ్యూచర్ పట్ల ఉండే ఇన్‌సెక్యూరిటీస్, తల్లిదండ్రుల పట్ల ఉండాల్సిన లాయల్టీ వంటి అంశాలను సెన్సిబుల్‌గా, బోల్డ్‌గా చెప్పే ప్రయత్నం చేశారు. అయితే ఈ సినిమా రిలీజ్ తర్వాత చాలా డిస్కషన్స్‌కు దారితీసే అవకాశం ఉంది. ఓటీటీలో అందుబాటులోకి వచ్చాక ఆ చర్చలు మరింత పెరగొచ్చు.

ఫోకస్ పాయింట్: జెంజీ యువత బయోపిక్‌ లాంటి ‘ఎపిక్’

రేటింగ్: 3/5