‘కల్కి 2’ ప్రాజెక్ట్‌లో ఇప్పుడు ప్రముఖ కథానాయిక దీపిక పడుకొణె భాగం కాదు. ఈ మేరకు ఇటీవల చిత్ర నిర్మాణ సంస్థ వైజయంతి మూవీస్‌ ఓ ప్రకటన కూడా చేసింది. సినిమా నుండి ఆమె తప్పుకుందా? లేక ఆమెను ఇక చాలు అని పంపించేశారా అనేది తెలియదు. ఈ విషయంలో కొన్ని రోజులు జరిగిన చర్చ ఇప్పుడు వేరే టర్న్‌ తీసుకుంది. ఆ పాత్ర కోసం ఎవరైతే బాగుంటారు అంటూ సోషల్‌ మీడియాలో గత కొన్ని రోజులుగా చర్చ జరుగుతోంది. ఫలానా హీరోయిన్‌ అయితే బాగుంటుంది చెబుతున్న మాటల్లో ఓ పేరు ఎక్కువగా వినిపిస్తోంది.
‘కల్కి 2898 AD’ సినిమాలో సుమతిగా ఓ ప్రధాన పాత్రలో నటించి మెప్పించింది దీపిక. దీంతో ఆ పాత్రను ఆమెలా స్టార్‌ హీరోయిన్‌ అయి ఉంది, చూడగానే భలే కుదిరిందే అనిపించాలా అంటే అనుష్క శెట్టి అయితేనే బెటర్‌ అనేది చాలా మంది అభిమానుల వాదన. గతంలో ప్రభాస్‌ – అనుష్క కలసి నటించిన సినిమాలు, ఇద్దరి మధ్య కెమిస్ట్రీ, స్క్రీన్‌ ప్రజెన్స్‌ను గుర్తు చేసుకుంటూ సోషల్‌ మీడియాలో పోస్టుఉ కనిపిస్తున్నాయి. మరోవైపు ఈ కాంబోకి ఎలాంటి ట్రోలింగ్‌ కూడా జరిగే అవకాశం లేదు. ఎందుకంటే డార్లింగ్‌ ఫ్యాన్స్‌కే కాదు.. సినిమా ప్రేక్షకులు అందిరకీ ఆ జోడీ చాలా స్పెషల్‌.
అనుష్క పేరు కాకుండా బాలీవుడ్‌, టాలీవుడ్‌లోని కొత్త హీరోయిన్లు, సీనియర్‌ హీరోయిన్ల పేర్లు చర్చలోకి వస్తున్నాయి. అయితే ఈ విషయంలో ఇప్పటికిప్పుడు టీమ్‌ కొత్త హీరోయిన్‌ ప్రకటనను చేస్తుంది అని చెప్పలేం. ఎందుకంటే రెండేళ్ల తర్వాత కానీ ఈ సినిమా ప్రారంభమయ్యే అవకాశం లేదని ప్రభాస్‌ సినిమాల లైనప్‌ చూస్తే అర్థమవుతోంది. ప్రస్తుతం డార్లింగ్‌ చేతిలో ‘ది రాజా సాబ్‌’, ‘ఫౌజీ’ (వర్కింగ్‌ టైటిల్‌), ‘సలార్‌ 2’ ఉన్నాయి. ఇది కాకుండా ప్రశాంత్‌ వర్మ దర్శకత్వంలో ‘బ్రహ్మ రాక్షస’లో నటిస్తాడని టాక్‌.
