Pushpa2: ‘పుష్ప 2’ లో అది తప్ప ఇంకో హైలెట్ లేదా..?!

ఐకాన్ స్టార్ అల్లు అర్జున్ (Allu Arjun) హీరోగా సుకుమార్ (Sukumar) దర్శకత్వంలో ‘పుష్ఫ’ (Pushpa)  అనే సినిమా రూపొందింది. 2021 డిసెంబర్ 17 న రిలీజ్ అయిన ఈ సినిమా బాక్సాఫీస్ వద్ద ఘన విజయం సాధించింది. తెలుగులో టికెట్ రేట్ల సమస్యల వల్ల అంతంత మాత్రమే కలెక్ట్ చేసినా.. నార్త్ లో మాత్రం కుమ్మేసింది ‘పుష్ప’ సినిమా. దీనికి రెండో భాగంగా ‘పుష్ప 2 ‘ (Pushpa 2)  రూపొందుతున్న సంగతి తెలిసిందే. మొదటి భాగం రూ.300 కోట్ల పైగా వసూళ్లు సాధించడంతో..

రెండో భాగం పై ఇండియా వైడ్ భారీ అంచనాలు ఏర్పడ్డాయి. ఆగష్టు 15 న ‘పుష్ప’ సినిమా రిలీజ్ అవుతున్నట్టు మేకర్స్ ఇప్పటికే ప్రకటించారు. షూటింగ్ 90 శాతం కంప్లీట్ అయ్యింది. కానీ పోస్ట్ ప్రొడక్షన్ పనుల కోసం ఇంకో 90 రోజులు టైం పడుతుంది అని వినికిడి. ఏదేమైనా ఆగష్టు 15 కే ‘పుష్ప 2 ‘ ని ప్రేక్షకుల ముందుకు తీసుకురావాలని చిత్ర బృందం పనిచేస్తుంది. ఇదిలా ఉండగా.. ‘పుష్ప 2 ‘ కి సంబంధించి ఇప్పటికే పలు అప్డేట్స్ ఇచ్చారు మేకర్స్.

అందులో ముందుగా ‘పుష్ప’ ఏమయ్యాడు అన్నట్టు ఓ వీడియోను విడుదల చేసి పులితో పోల్చి హైలెట్ చేశారు. బాగానే ఉంది. ఆ తర్వాత ‘పుష్ప’ ని గంగమ్మ తల్లిగా చీర కట్టుకుని ఉన్నట్లు ఓ ఫోటోని విడుదల చేశారు. అది కూడా ఇంట్రెస్టింగ్ గా ఉంది. ఇప్పుడు ఏప్రిల్ 8 న అల్లు అర్జున్ పుట్టినరోజు సందర్భంగా ‘పుష్ప 2 ‘ టీజర్ ను విడుదల చేస్తున్నట్లు ప్రకటించారు. ఆ విషయాన్ని తెలుపుతూ విడుదల చేసిన పోస్టర్లో కూడా ‘పుష్ప’ క్యారెక్టర్ గంగమ్మ తల్లి గెటప్ లో ఉన్నట్టు చూపించారు.

సినిమాలో గంగమ్మ తల్లి జాతర ఫైట్ హైలెట్ గా ఉంటుందని చిత్ర బృందం ముందు నుండి చెబుతుంది. కానీ ఈ సినిమాకి సంబంధించిన అప్డేట్..ల విషయంలో ప్రతీసారీ ‘గంగమ్మ తల్లి జాతర’ సీక్వెన్స్ నే హైలెట్ చేయడం కొంతమంది అల్లు అర్జున్ అభిమానులకి నచ్చినట్టు తెలుస్తుంది. ‘అది హైలెట్ అయ్యుండొచ్చు… కానీ ఆ ఎపిసోడ్ తప్ప సినిమాలో ఇంకో హైలెట్ లేదా ?’ అనే అభ్యంతరాలు కొంతమంది నుండి వ్యక్తమవుతున్నాయి.