యువ సామ్రాట్ నాగ చైతన్య భారీ ఖర్చులకు పోకుండా.. తనకి తగ్గ కథలను ఎంచుకుంటూ విజయాలను అందుకుంటున్నారు. అతని గత చిత్రం శైలజా రెడ్డి అల్లుడు మిశ్రమ స్పందన అందుకున్నప్పటికీ మంచి లాభాలను అందించింది. అందుకే అతని చిత్రాన్ని కొనుగోలు చేయడానికి డిస్ట్రిబ్యూటర్లు బారులు తీరుతున్నారు. చైతూ చేసిన తాజా చిత్రం సవ్యసాచి. ఇప్పటివరకు భారతీయ తెరపై రానటువంటి కథతో చందూ మొండేటి ఈ చిత్రాన్ని తెరకెక్కించారు. ముంబై బ్యూటీ నిధి అగర్వాల్ హీరోయిన్ గా నటించిన ఈ మూవీ నవంబర్ 2 న థియేటర్లోకి రానుంది. మాధవన్, భూమిక వంటి స్టార్ నటీనటులు కీలకపాత్రలు పోషించిన సినిమాపై మంచి అంచనాలున్నాయి. ట్రైలర్ ఆ అంచనాలను అమాంతం పెంచింది.
ఈ కారణాలతో ఈ సినిమా ప్రీ రిలీజ్ బిజినెస్ ఒక రేంజ్ లో జరిగిందని ఫిలిం నగర్ వాసులు చెబుతున్నారు. నాగచైతన్య కెరియర్లోనే గతంలోనే ఎన్నడూ లేని విధంగా ఈ సినిమా 22.32 కోట్ల ప్రీ రిలీజ్ బిజినెస్ ను జరుపుకుందని వెల్లడియించారు. ఈ సినిమాకి సంబంధించిన నైజామ్ ఏరియా హక్కులను దిల్ రాజు 6 కోట్లకు దక్కించుకున్నట్టుగా సమాచారం. చందూ మొండేటి, నాగ చైతన్య కలయికలో వచ్చిన ప్రేమమ్ సూపర్ హిట్ అయింది. ఆ కాంబోలో వస్తున్న ఈ మూవీ బ్లాక్ బస్టర్ హిట్ అవుతుందని అక్కినేని అభిమానులు ధీమా వ్యక్తం చేస్తున్నారు.
