యాక్షన్ సీన్స్ ని ఓ రేంజ్ లో వెండితెరపై ఆవిష్కరించే బోయపాటి శ్రీను.. మెగా పవర్ స్టార్ రామ్ చరణ్ తో బీభత్సం సృష్టించడానికి రెడీ అవుతున్నారు. ప్రీ ప్రొడక్షన్ వేగంగా సాగుతోన్న ఈ సినిమాలో రామ్ చరణ్ “రాజవంశస్థుడు”గా కనిపించబోతున్నట్లు తెలిసింది. అందుకే రాజస్థాన్ లో రాజా మహల్ ని షూటింగ్ కోసం లీజుకు తీసుకున్నారంట. దాదాపు 70 శాతం అక్కడే షూట్ చేయనున్నారు. తాజా సమాచారం ప్రకారం ఈ సినిమాలో చెర్రీ డ్యూయల్ రోల్‌లో కనిపించనున్నాడని ఫిలిం నగర్ వాసులు చెబుతున్నారు. అంతేకాదు గతంలో టాలీవుడ్‌లో చిరు హీరోగా వచ్చిన “రౌడీ” సినిమా, బాలీవుడ్‌లో సల్మాన్ ఖాన్ హీరోగా వచ్చిన “ప్రేమ్ రతన్ దన్ పాయో” సినిమా ఛాయలు ఈ సినిమాలో కనిపిస్తాయట.
అయితే కొత్త ఫీల్ రాబట్టేందుకు స్క్రిప్ట్ లో అనేక మార్పులు చేసినట్లు తెలిసింది. బాలీవుడ్ స్టార్ వివేక్ ఒబెరాయ్ విలన్ గా నటించనున్న ఈ చిత్రానికి తమన్ సంగీతం అందిస్తున్నారు. డీవీవీ దానయ్య నిర్మిస్తున్న ఈ సినిమాలో హీరోయిన్‌గా అను ఇమ్మాన్యుయెల్, కైరా అద్వానీ పేర్లు పరిశీలిస్తున్నారు. కైరా అద్వానీ అయితే ఈ చిత్రానికి బాలీవుడ్ లోను మార్కెట్ ఉంటుందని చిత్ర బృందం భావిస్తోంది. ప్రస్తుతం రామ్ చరణ్ డైరక్టర్ సుకుమార్ దర్శకత్వంలో “రంగస్థలం ” చేస్తున్నారు. సమంత హీరోయిన్ గా నటిస్తున్న ఈ మూవీ రెండు పాటలు మినహా షూటింగ్ మొత్తం పూర్తి చేసుకుంది. పాతికేళ్ల నటి కథలో రూపుదిద్దుకుంటున్న ఈ మూవీ మార్చిలో రిలీజ్ కానుంది.
Home