తన పర్సనల్ కుక్‌కి క్లాస్ తీసుకున్న తారక్

మాటల మాంత్రికుడు త్రివిక్రమ్ శ్రీనివాస్ దర్శకత్వంలో నటించడానికి ఎన్టీఆర్ చాలా ఉత్సాహంగా ఉన్నారు. అందుకోసమే బాగా కష్టపడుతున్నారు. డైరక్టర్ కోరుకున్న విధంగా బాడీని మలుచుకుంటున్నారు. బాలీవుడ్ ఫిట్ నెస్ ట్రైనర్ ఆధ్వర్యంలో అథ్లెటిక్ ఫిట్ బాడీ ని సొంతం చేసుకోవడానికి శ్రమిస్తున్నారు. ప్రతిరోజు మూడు గంటలపాటు జిమ్‌లోనే గడుపుతున్నారని తెలిసింది. అంతేకాదు తన పర్సనల్ కుక్‌కి వంటల విషయంలో క్లాస్ తీసుకున్నట్టు సమాచారం. ఏ సమయానికి ఏమి వండాలి? అందులో ఏ ఏ పదార్ధాలు వాడాలనే విషయాలని వివరంగా ఎన్టీఆర్ వివరించినట్టు ఫిలిం నగర్ వాసులు చెప్పుకుంటున్నారు.

తన కష్టానికి తగ్గట్టు సరైన ఆహారం తీసుకుంటే మంచి ఫలితం ఉంటుందని తారక్ తన చెఫ్ కి జాగ్రత్తలు చెప్పినట్లు సమాచారం. కొన్ని రోజుల క్రితం బయటికి వచ్చిన ఎన్టీఆర్ ఫోటో చూసి అందరూ శెభాష్ అన్నారు. మరి ఇప్పుడు ఎలా ఉంటారో చూడాలని అభిమానులు ఆశపడుతున్నారు. హారిక అండ్ హాసిని క్రియేషన్స్ బ్యానర్లో రాధాకృష్ణ నిర్మిస్తున్న ఈ చిత్రంలో ఎన్టీఆర్ సరసన పూజా హెగ్డే ఖరారు అయింది. ఎస్.ఎస్. థమన్ సంగీతం అందించనున్న ఈ సినిమాకు వినోద్ కెమెరా మెన్ గా ఫిక్స్ అయ్యారు. జై లవ కుశ సినిమా తర్వాత తెరకెక్కనున్న ఈ మూవీపై భారీ అంచనాలున్నాయి.