తాజాగా తారక్ కు కథలు చెప్పిన డైరక్టర్లు !

యంగ్ టైగర్ ఎన్టీఆర్ కథల ఎంపికలో ఆచి తూచి అడుగులు వేస్తున్నారు. చాలా కాలం తర్వాత హిట్ ట్రాక్  లోకి వచ్చిన తారక్ తొందరపడి నిర్ణయం తీసుకోవడం లేదు. జనతా గ్యారేజ్ తో హ్యాట్రిక్ సొంతం చేసుకున్న ఎన్టీఆర్ తర్వాత ఎవరి దర్శకత్వంలో నటిస్తారా? అని అభిమానులతో పాటు సినీ వర్గాల వారు ఎదురు చూస్తున్నారు. ప్రొడ్యూసర్ గా కళ్యాణ్ రామ్ ఒకే అయినా ఇంకా డైరక్టర్ ఫిక్స్ కాలేదు.

వక్కంతు వంశీ చెప్పిన కథ బాగున్నా, ఆ తరహా సినిమాలు ఇదివరకు చేసి ఉండడంతో ఎన్టీఆర్ ఆ స్టోరీని రిజర్వ్ లో పెట్టారు. పూరి జగన్నాథ్‌తో  చేయడానికి ఆసక్తిగా ఉన్నా కథ ఇంకా సిద్ధం కాలేదని తెలుస్తోంది. రీసెంట్ గా యువ దర్శకుడు అనిల్ రావిపూడి తారక్ కు కథ చెప్పినట్లు సమాచారం. ఇటు మెగా హీరోతో సుప్రీమ్, అటు నందమూరి కథానాయకుడు తో పటాస్ వంటి హిట్ సినిమాలు చేసి మంచి పేరు తెచ్చుకున్న అనిల్ చెప్పిన స్టోరీ పై ఇంకా తారక్ ఏ నిర్ణయం చెప్పలేదని టాక్.

తమిళ దర్శకుడు లింగుస్వామి కూడా ఇటీవల ఎన్టీఆర్‌కు ఓ కథ వినిపించినట్టు తెలిసింది. కొన్ని రోజులు విశ్రాంతి తీసుకొని కొత్త సినిమా పనుల్లో దిగాలని యంగ్ టైగర్ భావిస్తున్నారు. అందుకోసం కుటుంబంతో కలిసి విదేశాలకు వెళ్లనున్నారు. తిరిగి వచ్చిన వెంటనే తారక్ తదుపరి చిత్రం ఎవరితో అనే విషయంపై ప్రకటిస్తారని ఆయన సన్నిహితులు చెబుతున్నారు.