మొన్నీ మధ్య ‘భర్త మహాశయులకు విజ్ఞప్తి’ సినిమా రిలీజ్కి ముందు ఓ విషయంలో చిన్నపాటి చర్చ జరిగింది. అదే ఆ సినిమా టైటిల్ కార్డ్స్లో హీరో రవితేజ తన బిరుదు వేయొద్దు అన్నారని. మామూలుగా అయితే హీరోలు తమకు ఇచ్చిన/ ఇప్పించుకున్న బిరుదును ఘనంగా రాస్తారు. ఫ్యాన్స్, అభిమానులు ఎక్కడ మరచిపోతారేమో అని తమ పీఆర్ టీమ్తో ప్రతి సోషల్ మీడియా పోస్టులో రాయిస్తుంటారు. కానీ రవితే అయితే మాస్ మహారాజ్ అనే బిరుదు ఈ సినిమాకు సంబంధించినంతవరకు వద్దన్నాడు.
నిజానికి ఈ మాట కొత్తేం కాదు. గతంలో కొంతమంది హీరోలు చేశారు. కొన్ని రోజుల తర్వాత తిరిగి తమ పేరు ముందు తగిలించుకున్నారు. కొంతమంది ఎందుకు అనేది చెప్పినా.. ఇంకొంతమంది ఎందుకు తీసేశారు అనే విషయంలో కానీ, ఎందుకు తిరిగి తగిలించుకున్నారు అనే విషయంలో కానీ ఎలాంటి సమాచారం ఉండదు. ఇప్పుడు కమల్ హాసన్ ఇలానే తన బిరుదును తీసేసి, తిరిగి ఇప్పుడు తగిలించుకున్నారు. KHxRK సినిమా పోస్టర్, వీడియో ఇటీవల వచ్చాయి. అందులో కమల్ బిరుదు ఉళగనాయగన్ తిరిగి వచ్చేసింది.
గత కొన్ని సినిమాల్లో కమల్ ఈ పేరు లేకుండానే టైటిల్ కార్డులు పడుతూ వస్తున్నాయి. దీనికి కారణం 2024 ఆఖరులో తనకు ట్యాగ్స్ వద్దు అని కమల్ ప్రకటించారు. దాంతో యూనివర్శల్ హీరో / లోక నాయకుడు / ఉలగ నాయగన్ అనే ట్యాగ్ కనిపించలేదు. మరిప్పుడు ఏమైందో ఈ సినిమాకు వాడేశారు. ఎందుకు అనేది త్వరలో మీడియా ముందుకు ఆయన వస్తే తెలిసే ఛాన్స్ ఉంది. ఇక ఆ మధ్య పవన్ కల్యాణ్ కూడా ఇలానే ట్యాగ్ వద్దన్నారు. కొన్ని సినిమాలు అలా ట్యాగ్ లేకుండానే వచ్చాయి. కానీ ‘ఓజీ’ సినిమా సమయంలో ట్యాగ్ వేశారు.
అంటే ట్యాగ్ తీసేయడానికి ఎంత పెద్ద కారణం ఉన్నా.. తిరిగి అంతకుమించిన పెద్ద కారణంతో తిరిగి తెచ్చుకుంటున్నారు. అది సినిమా ఫలితమూ అయ్యే అవకాశం ఉంది.
