సౌత్ ఇండియన్ సినిమా అభిమానులకు ఈ ఏడాది చివరలో ప్రత్యేకంగా నిలిచేలా రెండు భారీ చిత్రాలు ‘కంగువా’ (Kanguva) – ‘పుష్ప 2’ విడుదలకు సిద్ధమవుతున్నాయి. సూర్య (Suriya) ప్రధాన పాత్రలో శివ (Siva) దర్శకత్వం వహించిన ‘కంగువా’ నవంబర్ 14న ప్రపంచవ్యాప్తంగా విడుదలకాబోతోంది. ఈ చిత్రానికి నిర్మాత ధనుంజయ్ 10,000 స్క్రీన్లలో రిలీజ్ చేస్తామని ప్రకటించి అందరి దృష్టిని ఆకర్షించారు. సూర్య ఈ సినిమాలో ఆరు విభిన్న పాత్రల్లో కనిపించనున్నారని, యాక్షన్తో పాటు ఎమోషన్ను సమర్థంగా ప్రదర్శించేలా చిత్రాన్ని తీర్చిదిద్దామని తెలిపారు.
ఇదే సమయంలో, సుకుమార్ (Sukumar) దర్శకత్వంలో అల్లు అర్జున్ (Allu Arjun) నటిస్తున్న ‘పుష్ప: ది రూల్’ (Pushpa 2)మరో భారీ స్థాయి చిత్రంగా 11,500 స్క్రీన్లలో విడుదలకు సిద్ధంగా ఉంది. మొదటి భాగం ‘పుష్ప: ది రైజ్’ (Pushpa) సూపర్ హిట్ కావడంతో, ఈ సీక్వెల్పై భారీ అంచనాలు ఏర్పడ్డాయి. ఇండియాలో 6,500 స్క్రీన్లలో అలాగే ఓవర్సీస్లో 5,000 స్క్రీన్లలో విడుదల చేయబోతున్న ఈ సినిమా, అల్లు అర్జున్ను పాన్ ఇండియా స్టార్గా మరింత పాపులారిటీని అందిస్తుందని నిర్మాతలు ఆశాభావంతో ఉన్నారు.
ఈ రెండు చిత్రాల యొక్క స్క్రీన్ లెక్కలు పరిశీలిస్తే ‘పుష్ప 2’కే మరింతగా స్క్రీన్లలో రిలీజ్ అవుతున్నట్లు తెలుస్తోంది. ఈ విషయంలో అప్పర్ హ్యాండ్ పుష్పకే ఉన్నట్లు అనిపిస్తోంది. కానీ సూర్యకు సౌత్ ఇండియాలో ఉన్న పాపులారిటీ, అభిమానుల అంచనాలు కూడా ‘కంగువా’ చిత్రం పై భారీగా ఉన్నాయి. కాబట్టి రెండు చిత్రాలు కూడా వసూళ్ళ పరంగా పోటాపోటీగా నిలుస్తాయని సినీ విశ్లేషకులు భావిస్తున్నారు.
ఇక, రెండు చిత్రాల నిర్మాతలు కూడా ఎటువంటి పరిస్థితులకైనా సిద్ధంగా ఉండేలా ప్రచార కార్యక్రమాలను నిర్వహిస్తున్నారు. భారీ స్థాయిలో సినిమాలకు హైప్ క్రియేట్ చేయడంలో సూర్య, అల్లు అర్జున్ టెక్నికల్ టీమ్ కూడా శక్తివంచన లేకుండా పని చేస్తోంది. 1000 కోట్ల బాక్సాఫీస్ టార్గెట్ పెట్టుకొని రెండు చిత్రాలు కూడా దూసుకుపోతున్నాయి. ఇక ప్రేక్షకులకు ఈ రెండు భారీ చిత్రాలు పండుగను తలపించనుండగా, ఏ చిత్రం ఎక్కువ కలెక్షన్లు సాధిస్తుందో చూడాలి.
